Осмомартовска поетска порака за сите жени од поетесата Десанка Николова: ТИ ЖЕНО!
По повод Денот на жената, 8 Март, чествуваме со поетесата м-р Десанка Николова, авторка на девет стихозбирки, меѓу кои и „Македонствување“ – стихозбирка која е вистински чувар на сѐ наше македонско, македонскиот јазик, македонската култура и традиција, македонскиот идентитет, македонските духовни вредности.
Овојпат празнично ги прегрнуваме сите жени, со песната ТИ ЖЕНО!
ТИ ЖЕНО!
Земи го огледалото в рака,
насмевни му се
и трепни му неколку пати со очите,
па гледај во ликот што од другата страна
тебе ти се насмевнува,
гледај невино како дете годиначе
што светот го запознава.
Насмевнувај му се додека очите
од среќа не ти заблескаат,
како најсреќна да си –
оти најсреќна треба да бидеш!
И разгалувај се како маче предалче
во скут крај камин што преде.
Додека се погледнуваш
сети се на зборовите
на баба ти и мајка ти
како чеиз што ти ги оставија.
Не ги гледај брчките ниту лузните
што времето ти ги направило,
без нив немаше да научиш
како карпа да бидеш,
да можеш и кога не можеш,
да се смееш и кога ти се плаче,
да бидеш најсилна кога најмногу се кршиш,
а кога си скршена
да ги собереш сите делови
и пак да бидеш ти.
Види ја пред себе
најсилната, најубавата ти
И прости си себе си:
Прости си за сите погрешни избори,
прости си за сите гревови ненаправени,
прости си за сите љубови неостварени,
прости си за сите шанси пропуштени,
но не си простувај
ако ко есенски лист паднат на земја те газат,
не си простувај ако си безгласна буква,
ако молчиш и молчејќи
неправди проголтуваш,
не простувај си ако трпиш
и трпејќи тонеш.
И немој, не заборавај:
Ти си жена!
Ти си силна!
Ти си храбра!
Намести ја косата најубаво,
стави црвен кармин на усните,
напудри го лицето,
зарумени ги образите,
размрдај ги колковите,
разиграј ги градите.
Ти си најубава.
Ти си своја.
Ти си единствена.
Жена си!
Облечи насмевка и во нови победи тргни,
женствено, ама со чекори машки.
Та нели жени сме!
Ти жено!
