Од шупа направил електрана: Му се смееле за неговото хоби, но денес има бесплатна струја

Анонимен технолошки ентузијаст, познат само по прекарот Глубукс, започнал нешто што изгледало како скромен експеримент пред речиси девет години. Имал неколку соларни панели на покривот, стара батерија и желба сам да генерира електрична енергија.

Во ноември 2016 година, тој запишал дека има 1,4 kW соларни панели, истрошена батерија за виљушкар од 24 волти, контролер за полнење и инвертер од 3 kVA. Исто така, собрал околу 650 користени батерии за лаптоп кои планирал да ги претвори во дополнителен капацитет за складирање на енергија.

Од самиот почеток се соочил со голем предизвик – батериите биле со различна старост, квалитет и капацитет. Некои се празнeле премногу брзо, системот бил нестабилен, а напонот често флуктуирал. Наместо да се откаже, Глубукс решил целосно да ги расклопи сите батерии и да ја тестира секоја ќелија поединечно.

Го отворил секое куќиште рачно, ја проверил секоја ќелија, ги отфрлил расипаните и ги поврзал само оние со споредливи карактеристики. На овој начин, тој составил блокови од 100 Ah, кои ги составил во специјални модули сместени во мала барака, на околу 50 метри од неговата куќа.

Таа барака постепено станала „срцето на електраната“. Денес, сите батерии, регулатори и инвертори се наоѓаат таму, заштитени од временските услови и секојдневното абење. Стара батерија на виљушкар останала дел од системот како стабилизатор на оптоварување.

Со текот на времето, тој додал уште 24 соларни панели, секој со моќност од 440 W. Благодарение на ова, неговиот систем успева да ги полни батериите дури и во кратките зимски денови кога речиси и да нема сонце. Паралелно, тој продолжил да собира стари батерии за лаптопи сè додека не собрал илјада од нив.

Секоја од нив била расклопена, секоја ќелија тестирана и повторно употребена во нови, стабилни модули. Она што за мнозинството е само електронски отпад, станало основа за целосна енергетска независност.