Никогаш не дозволувајте да ја изгубите надежта во животот

Каков би бил човекот доколку би немал надеж за утрешниот ден?

Каков би бил човекот доколку би немал надеж за утрешниот ден? Со какви мисли ќе заспива навечер, а со какви ќе се буди наутро? Дали и тогаш животот би се нарекувал „живот“? Она што ве тера да станете од кревет, да ги протриете своите очи да ја подигнете вашата глава – тоа е вашата надеж. Надеж која се раѓа од самиот факт што вие сте живи и дека од Бог ви е даден уште еден нов ден, ден кога треба повторно и повторно да го барате своето место под ова небо. Животот носи и одзема. Во еден момент ве става горди на пиедесталот, а веќе во наредниот се гледате себеси како ги собирате паднатите трошки од земјата. Една секунда не можете да ја сопрете смеата, а друга секунда ви се навлажнуваат вашите раце бришејќи ги врелите солзи. Еден ден имате сѐ, а веќе другиот ден го чувствувате студенилото на празнината. Таков е животот. Такви се и луѓето. Такво е живеењето. Но ниту една состојба не е вечна. Ниту еден миг не трае засекогаш. Можеби болката ќе остане во вас, а последиците ќе ги чувствувате и понатаму, но и покрај сето ова, од некое мало ќоше ќе се појават сончевите зраци, кои ќе ве помилуваат и ќе ве потсетат дека сте живи. Не дозволувајте да бидете опседнати од вечно студенило, барајте ја надежта која многу често знае да биде скриена помеѓу купиштата болка. Загубата е тешка затоа што со себе однесува и дел од вас, а ви ги остава спомените кои постојано ве потсетуваат дека ви недостига нешто, но покрај сето тоа, не дозволувајте си да ја изгубите и вашата надеж. Токму надежта е зрното семе од кое после одредено време ќе израсне нешто поголемо, а потоа и ќе почне да дава и плодови. Да, тоа истото мало семе кое навидум е безначајно, по одредено време и со одредена грижа, ќе успее да биде корисно и самото тоа да придонесува со нешто во овој свет.

Така е и со надежта. Негувајте го тоа мало зрно кое ќе го пронајдете. Никогаш не заборавајте да се потсетите на неа и да ѝ отворите посебно место во вашето срце. Кога ќе мислите дека немате ништо друго на овој свет, дозволете ѝ на надежта да ги презема работите во свои раце!