Нема да ви се верува колку пари им земале во Скопје водоводџиите што ги викнале преку оглас
Им се затнал цевката, мајсторите им наплатиле 60.000 денари
Во последните неколку години навистина е тешко да се најде добар мајстор кој би можел да ви заврши работа во домот.
Многу мајстори заминаа да работат во странство, а младите ги избегнуваат овие професии како вампир што избегнува црква или крст, иако оние малкумина мајстори што останаа во Македонија, сега и не заработуваат толку лошо.
Па така некои од овие мајстори дневно заработуваат околу 100 евра, што е потполно заслужено бидејќи работат тешка работа.
Фото: Фрипик
Но тоа секако се однесува доколку ја завршат работата, а сите знаеме колку денес е тешко да се дојде до квалитетен мајстор. Од овие причини многу често се случува работата да е толку лошо завршена што луѓето мораат да бараат друг мајстор, а не е мал и бројот на оние коишто биле измамени од некои мајстори.
Токму за еден ваков случај неодамна ни пренесе еден наш сограѓани, кој сакаше да остане анонимен, но сакаше да ги предупреди другите да внимаваат кога преку огласник ќе бараат мајстори за истиот проблем.
Имено, овој наш сограѓанин ја сподели неговата мака со нас и ни откри како мајсторот што го викнале убаво го измамил.
Фото: Фрипик
„Бев наивен и мислев дека луѓето се чесни, но ете има и такви кои ќе ви ги соберат и последните пари што ги имате“, се пожали тој.
Како што потоа ни објасни, сé се случило откако неговата комшивка што живее под него, а која е жена во постари години, го викнала заради проблеми во нејзиниот тоалет. Она што веднаш го забележале дека одводната цевка од канализацијата со која е поврзана шолјата била затната, па затоа во станот под бабата, во која живее млад брачен пар, почнало да тече канализација.
И бидејќи било недела, не знаеле кому да му се обратат, па се јавиле на еден оглас кој го нашле на интернет, а во кој нуделе вакви услуги.
„Мајсторите дојдоа и веднаш почнаа да работат. Ја отворија надворешната шахта што се наоѓа пред зградата и со едно тенко црево и некаков си агрегат се обидуваа да ја исчистат цевката И не велам дека не работеа, се мачеа луѓето неколку часови, на едно место дури мораше и да ја пресечат цевката.., и на крај некако успеаја“.
„Цевката беше исчистена, или барем така ми кажаа, но проблемот настана кога требаше да им платиме за услугата. Тие ни побараа 60.000 денари, сума која навистина сметам дека е преголема. Не заменија ништо, туку само пробија во цевките за да може да тече водата. Се расправавме некое време, но што да правиме, ние сме луѓе во години, тие млади и решителни да ни го соберат и последниот денар, што и го направија. На крај не ни дадоа ниту фискална, па еве решив да ги предупредам другите кога ќе се јават на оглас за сличен проблем најпрво да се договорат за цената, бидејќи има секакви има…“, ни откри овој човек, кој исто така е во повозрасни години.
Подоцна разбравме дека сме можеле и да викнеме цистерна од водовод и тие за сума од околу 2000 денари би ни го решиле проблемот.
„Но ова никој не ни го кажа, а овие мајстори сигурно знаеја и за оваа опција, но ете, наместо да не посоветуваат што да направиме, решија сами да ја одзатнат цевката, ана крај и да ни ги испразнат паричниците на мене и бабичката“ вели на крајот овој наш сограѓанин чие име е познато на редакцијата, но не сакаше да биде објавено бидејќи сметаше дека нема потреба од тоа.
Па, дали некогаш сте се нашле во слична ситуација и дали вие би им платиле на овие мајстори толкава сума на пари?
