Не сум на овој свет за да жалам за некој или нешто. Кога последен пат жалев за некој, многу брзо сфатив дека жалам за себе без тој некој, а не таа личност. Не сум тука да ги исполнувам туѓите очекувања, да се жалам, да ги пропуштам шансите…
Не сум тука да бидам секогаш одлично расположена и насмеана, затоа што имам и периоди кога сум тажна, а не сакам да глумам. Не сум на овој свет само за да работам. Сакам да имам време и да одморам, да прошетам и да бидам со оние кои ми значат. Сакам да се забавувам, да заведувам, да не се мешам во туѓи животи, а и другите да не се мешаат во мојот.
Сакам да станам и да не чувствувам обврска да си ја ставам маската за да излезам. Сакам да бидам она што сум и на светот да му го покажам моето вистинско лице. Не можам повеќе да им го нудам на луѓето она што сакаат да го слушнат или она што сакаат да го имаат, а притоа да се изгубам себеси и да се затворам во лавиринтот од кој тешко се излегува.
Не сум на овој свет да вегетирам. Јас сум овде за да живеам, да бидам и тажна и среќна, да бидам и дама, но и неуредна девојка која знае да спие со денови. Едноставно е – сакам да го изразам моето вистинско ЈАС, без очекувања, без преправања, без лаги!
