Направете го ова утре за да имате „ловечка“ среќа и семеен мир – го славиме заштитникот на ловците и семејствата
Свети великомаченик Евстатиј од најстаро време се почитува како заштитник на ловот, ловците и шумите. Неговото чудесно јавување на Бога преку ликот на еленот станало симбол на преобразбата од земна страст во духовна вера.
Православните верници утре, 3 октомври, го чествуваат Свети Евстатиј, кој пред крштението се викал Плакида, и бил римски војсководец во времето на царевите Тит и Трајан, односно во 1 век. Иако паганин, бил познат како праведен и добар човек, омилен меѓу народот. Една од неговите најголеми страсти бил ловот.
Преданието вели дека за време на лов во шумата, Евстатиј здогледал елен меѓу чии рогови засветел крст. Во тој миг му се јавил Бог, а Евстатиј, потресен од чудото, подоцна заедно со својата сопруга и двајцата синови се крстиле и тој добил ново име. Господ му прорекол дека ќе го чека тежок живот, исполнет со искушенија, но и вечна слава заради неговата верност кон Христа.
По крштевањето, Евстатиј со семејството живеел скромно меѓу обичниот народ, помагајќи на сиромашни и страдалници. Но, како што било претскажано, го снашле големи маки – варвари му ја заробиле жената, а ѕверови му ги разнеле децата. Подоцна, со Божја промисла, семејството повторно било обединето.
Кога се вратил во Рим, на престолот веќе бил цар Адријан, кој од него барал да принесе жртви на паганските богови. Евстатиј одбил, сведочејќи дека е христијанин. Поради тоа тој, сопругата и децата биле фрлени на ѕверови, но животните не ги допреле. Тогаш царот наредил да бидат затворени во вжештен метален вол. По три дена ги извадиле мртви, но нивните тела останале неповредени и несогорени. Христијаните ги погребале со голема чест, а Црквата ги прославила како светители и маченици.
Заштитник на ловците, шумите и семејниот мир
Свети великомаченик Евстатиј од најстаро време се почитува како заштитник на ловот, ловците и шумите. Неговото чудесно јавување на Бога преку ликот на еленот станало симбол на преобразбата од земна страст во духовна вера.
Во народната традиција, на овој ден верниците излегуваат во природа, во шуми или на ливади, во негова чест. Се верува дека тој што ќе го испочитува овој обичај ќе биде придружуван од добра „ловечка“ среќа, успех во работата и благослов во домот.
Денот се поврзува и со зачувување на семејниот мир и хармонија, како што Евстатиј ги поднел сите искушенија со вера и трпение, така и семејствата што ќе го празнуваат ќе бидат заштитени од несогласувања и неволји.
