Јадењето за двајца е големо задоволство но истовремено и голема одговорност, особено ако се земат во предвид различните информации во врска со тоа што треба а што не треба да се јаде во текот на бременоста.
Рибата е многу важна – но дали содржи премногу жива? Дали навистина ви е потребно месо за да внесувате протеини – или тоа е премногу мрсно па треба да се одлучите за растителни извори на протеини? Дали јајцата се добри или имаат многу холестерол па треба внимателно со нив?
Ако постојано читате на оваа тема, лесно може да ви дојде преку глава од сé, па едноставно да си изедете едно чоколадо. Но, сепак, многу е важно да осигурате дека ги внесувате сите хранливи материи што ви се потребни и вам и на бебето. Следи листа на намирници што ги препорачуваат врвните експерти, од која можете да си одберете што ви одговара, не мора да јадете сé што е наведено. Секако, не е на одмет да се запознаете со главните предности и користи од наведената храна.
Темнозелен, листест зеленчук
Спанаќот, кељот и другиот зелен листест зеленчук се преполни со витамини и хранливи материи, вклучувајќи ги витамините А, Ц и К како и многу важниот фолат. Исто така, утврдено е дека тие се добри и за здрави очи.
Зрнест зеленчук
Зрнестиот зеленчук како грав, грашок, леќа, содржи најмногу влакна и протеини од сите зеленчуци. Протеините се важни во бременоста, тоа сите го знаеме, но влакната се исто многу важни бидејќи во бременоста работата на дигестивниот систем се успорува и постои ризик од појава на затвор или хемороиди. Влакната можат да ги спречат или олеснат ваквите проблеми. Исто така зрнестиот зеленчук содржи железо, фолат, калциум и цинк.
Разнобојно овошје и зеленчук
Разновидните зелени, црвени, портокалови, жолти, модри или бели овошја и зеленчуци ќе осигурат дека вие и вашето бебе добивате разновидни хранливи материи. Секоја боја обезбедува различни витамини, минерали и антиоксиданси. Во подоцнежните фази на бременоста, бебето ја „пробува“ храната што ја внесувате преку плодовата вода. Според тоа, ако му претставите низа различни овошја и зеленчуци на бебето додека е уште во утробата, имате поголеми шанси бебето да ги препознае и прифати тие вкусови подоцна.
Семки од сончоглед
Поволно делува и на мајката и на бебето. Ја зголемува енергијата и го храни бебето. Железото е многу важно за физичкиот раст и развојот на мозокот на бебето и го помага производството на крв која е потребна за снабдување на хранливи состојки во плацентата. Ако трудниците не внесуваат доволно железо можат да се чувствуваат уморно и ќе бидат подложни на инфекции. Постои и ризик од предвремено породување и мала породилна тежина на бебето.
Јајца
Витаминот Б6 помага на телото да ги обработи протеините, мастите и јаглените хидрати. Исто така помага и во формирањето на нови црвени крвни зрнца, антитела и невротрансмитери, и е од витално значење за развој на мозокот на бебето и нервниот систем. Едно јајце има само околу 90 калории а содржи над 12 витамини и минерали, и секако протеини кои се многу важни во бременоста. Не грижете се за холестеролот, на пример заситените масти се многу поопасни од холестеролот што природно се наоѓа во храната. Здравите жени со нормално ниво на холестерол можат да јадат едно до две јајца дневно.
Немрсно месо
Месото е одличен извор на високо квалитетни протеини, но треба да се потрудите да јадете немрсно месо со сите мрсни делови отстранети, најдобро телешко и говедско. Посебно кога ќе купувате и јадете свинско погрижете се сите видливи маснотии да бидат отстранети. Задржете се на месо од познати производители и избегнувајте месни преработки. Говедското и свинското се издвојуваат од останатите меса по тоа што освен протеини содржат и холин, витамин од Б комплексот.
Тиква
Многу бремени жени страдаат од опстипација, т.е. затвор предизвикан од големите хормонални промени кои влијаат на системот за варење. За да ја поттикнете работата на цревата се препорачува исхрана богата со влакна, бидејќи тие помагаат да се апсорбира вишокот киселини и гасови, го забрзуваат варењето и празнењето на цревата. Богат извор на влакна се намирниците како ориз, суви смокви, грав и авокадо. Тиквата е богат извор на влакна, и делува како благ лаксатив.
Јогурт и мед
Поволно влијаат и на мајката и на бебето. Јогуртот содржи голема количини калциум кој е важен за изградбата на коските на бебето во текот на бременоста, а заедно со медот дава енергија и го потиснува уморот. Млечните протеини се извор на витамини А и Д, неопходни за изградба на коските. Ако не внесувате доволно калциум во бременоста, ограничената количина што ја имате ќе отиде кај бебето, извлекувајќи го калциумот од вашите коски и заби. Целта во бременоста е да ги обезбедите сите потребни хранливи материи за бебето, без притоа да го лишувате вашиот организам.
Смокви
Помош за мајката: ги ублажуваат киселините и задржувањето на вода
Сушените смокви се полни со дигестивни ензими, кои помагаат да се свари храната и ги ублажуваат киселините. Исто така се богати и со калиум, кој помага да се одржи рамнотежа на течностите во текот на бременоста, што помага да се избегне отекувањето на рацете, нозете и зглобовите.
Мрсна риба
Корист за бебето: го одржува здрав нервниот систем
Омега-3 масните киселини се од витално значење за мозокот и нервниот систем на бебето, како и за менталното здравје. Туната, скушата и сардините се богат извор на омега 3 масни киселини, но јадете ги само два пати неделно. Масните киселини го помагаат развојот на мозокот и ги подобруваат неговите функции, така што грицки со сусам на пример ве одржуваат ментално будни цел ден.
Ѓумбир
Ѓумбирот ги ублажува утринските мачнини на идните мајки. Во Кина ѓумбирот се користи веќе 2000 години да го помогне варењето, како и во лекувањето на проблеми со стомакот, пролив и мачнини. Можете да јадете бисквити со ѓумбир или пак едноставно да пиете чај.
Фолна киселина
Ако сакате да го зголемите внесот на фолна киселина јадете леќа, една чаша содржи 358mcg фолна киселина, а препорачаната дневна количина е 400mcg. И јагодите исто така се одличен извор на фолна киселина. Финските научници утврдиле дека трудниците кои јадат чоколадо раѓаат посреќни, повесели бебиња, но секако немојте да претерувате!
Ореви
Не сакате риба или јајца но сепак ги сакате оние омега 3 масни киселини кои се толку важни за развојот на мозокот на вашето бебе? Јадете ореви бидејќи тие се еден од најбогатите растителни извори на омега 3. Една шака ореви е одлична ужина или пак додаток на салата.
Бадеми и кајсии
Една шака бадеми и суви кајсии ќе ви ја задоволат желбата за благо и ќе ви обезбедат протеини, ќе ви го намалат апетитот и ќе се чувствувате сити подолго време.
Пашканат
Пашканатот е одличен извор на влакна и фолати (природен облик на фолна киселина), како и калиум (го намалува крвниот притисок), што е од суштествено значење за заштита од прееклампсија, состојба предизвикана од висок крвен притисок.
Пуканки и други интегрални жита
Да, добро прочитавте. Пуканките се цели зрна. Сепак, потрудете се да ги јадете без (многу) масло и сол. Интегралните жита се добри во бременоста бидејќи содржат голема количина на влакна и хранливи материи, како витамин Е, селен и фитонутриенти кои ги штитат клетките. Не се задржувајте само на пуканките, имате голем избор на интегрални житарки од овес или трици до интегрални лебови со различни цели зрна и дури и интегрални грицки.
Извор: Babycenter.com, Штипка
