Печените крофни полнети со крем од ванила, познати како Ванилиј булар, ни ги приготви Зорка Јанчева и ни го откри рецептот.
Ќе се стопите уште на прв залак. Вакво нешто претходно не сте пробале.
Затоа, засукајте ги ракавите и право во кујна. Израдувајте ги најблиските уште овој викенд и засладете си ја душичката.
50 гр свеж квасец (или една коцка)
150 гр маргарин
4 дл млеко
2 јајца
100 гр шеќер
половина лажичка сол
помалку од половина лажичка бикарбона
1 300 гр брашно (13 дл)
Сите состојки се ставаат во сад за месење. Квасецот и маргаринот се растопуваат, и се става и млекото во маргаринот. Убаво измешајте. Потоа се додаваат на останатите состојки и се меси убаво, меко тесто.
Се остава да „кисне“ 40 минути.
Потоа од тестото се прават мали топчиња, околу 40 топчиња. Секое од нив се расукува во обем на мало чинивче. Се додава ванила кремот.
Зорка употребува готов ванила-крем, односно оној што се продава во прав во ќесички, и на него додава млеко. Но, по препорака на Зорка, може да ставите и ванила пудинг. И повторно се формираат топчиња.
Откако ќе се направат се оставаат да нараснат, околу 1 час.
Полнетите топчиња со крем од ванила се ставаат во тава и се печат 8 до 10 минути на претходно загреана рерна на 180 степени.
Во меѓувреме, во тенџерче се растопува околу 100 грама маргарин, се премачкуваат жешките полнети топчиња, а на крај се премачкуваат со шеќер (или ванилин шеќер).
И – подготвени се за јадење!
