Боже, спаси ме мене, грешникот… Молитва за пронаоѓање мир и утеха
Во моментите кога сме вознемирени и очајно ни треба мир и нечија утеха, да се помолиме и да го пронајдеме нашиот вистински пат…
Господе, Ти ја знаеш слабоста на моето срце, знаеш колку често им се предавам на ѓаволските искушенија и се исполнувам со гордост и надменост. Имам високи мислења за себе, се гордеам пред своите блиски и поради самољубивост очекувам и од нив да ме почитуваат многу повеќе отколку што заслужувам. Затоа, Господе, мојата душа нема смирение и моето срце не наоѓа утеха. Во мојата самољубивост ме изеде гордоста и не ми дава спокој. Ми ги нарушува односите со блиските, ме тера на карање и ми носи неспокој во животот.
Дај ми сила да го победам лошиот дух кој ме напаѓа и ме мачи и кој ме тера да се гордеам. Приведи ме на смирение, смири ме а љубовта нека ја оправда мојата верба кон тебе и нека ме води кон спасување. Преку смирување направи ме наследник на Твоето вечно царство. Воздигни ме над слабостите мои и дај ми да ги сфатам сите добра на земјата.
Ти, кој даваш вистински добрини, дај ми ги и на мене и всади ги во мојата душа. Сочувај ме од надменоста над другите и удостој ме со смирение да го носам она што Ти ми го подари. Боже, биди милостив кон мене, грешникот. Амин.
