За секој нов ден, за секоја нова радост, за секој нов миг и за секоја нова можност, треба да му бидеме благодарни на Бога. Помолете се со оваа молитва за благодарност, во знак на сето она што Бог ви го дарил.
Господи Исусе Христе, Боже наш, Боже на секое милосрдие и добрини! Твојата милост е безгранична а човекољубието неизмерно. Со благовение и љубов, како недостојни слуги, смирено Ти принесуваме благодарност, Тебе добросрдечниот, за добрините што ни ги правиш. Те славиме, Те воспеваме и Те величиме како наш Господ, Владика и добротвор и, коленичејќи пред Тебе, Ти благодарам за Твоето безмерно и неискажливо милосрдие.
Смирено Ти се молам милосрден Господи, како што сега благоволи да ги исполниш молбите на нас Твоите раби, така и понатака сподоби нè да ги добиваме сите Твои дарови, да преуспеваме во љубовта кон Тебе, кон ближните и кон секоја добродетел. Избавувај ја, милостив Боже, Твојата света Црква од секое зло, и откако ќе ни даруваш мир и спокој, удостој не’ да Ти принесуваме благодарност, Тебе, на Твојот беспочетен Отец и на пресветиот, благиот и живототворен Твој Дух – Бога прославуван во едно суштество, секогаш да зборувам за твоите големи добрини и да те воспеваме.
Слава Ти Тебе, наш благодателу, во век и веков! Амин!
