Македонските музички ѕвезди запеаја заедно за СОС Детско село – песна што ќе остави трага
Музички проекто со силна порака што ги обедини македонските музички ѕвезди.
Во чест на 25-годишнината од постоењето на СОС Детско село Македонија, создаден е музички проект кој носи силна порака за љубов, поддршка и детска радост.
Намерата беше да се создаде нешто што ќе остави трага – дело кое ќе им припаѓа на сите деца поддржани од организацијата, но и на сите луѓе кои веруваат во големото значење на среќното детство.
Музиката и дел од аранжманот се дело на Игор Атанасоски – Харе, кој учествува и како гитарист. Во продукцијата се вклучени и Трајко Симоновски – Таци (бас гитара), Давор Јордановски (клавијатури и синтисајзер) и Мите Димовски (тапани, снимање и продукција), кој заедно со Атанасоски го потпишува аранжманот. Снимено и продуцирано е во студиото „Тралала“ во Скопје.
Музичкиот проект добива дополнителна тежина преку вокалните изведби на познати македонски музичари: Игор Џамбазов, Тамара Тодевска, Андријана Јаневска, Влатко Лозаноски – Лозано, Дани Димитровска, Сара Мејс, Стефан од дуото Некст Тајм, Антонија Гиговска, Пере од групата Нокаут и Мијата.
Режијата и продукцијата на видеото се дело на Александар Ристовски – Принц, кој преку визуелниот израз ја засилува пораката на проектот: секое дете заслужува да расте со насмевка.
Песната претставува траен симбол на хуманоста и вредностите што СОС Детско село ги негува повеќе од две децении – безрезервна грижа, поддршка и љубов за секое дете.
