Македонски градоначалник на првиот работен ден ја донираше платата на комунален работник

Градоначалникот на општина Делчево Иван Гоцевски го започна својот прв работен ден со симболичен чин на благодарност кон еден од најдобрите работници на комуналното претпријатие, Горан Узунски.

Како знак на признание, тој објави дека првата градоначалничка плата ќе ја донира токму на Узунски.

Узунски од Тработивиште на овој начин доби посебно признание за особен придонес во одржувањето на хигиената во градот Делчево и околината.

– Со солзи во очите Горан Узунски, вработен во ЈКП Брегалница ја прими благодарницата од новиот градоначалник Иван Гоцевски кој го истакна како поединец на кој сите треба да се угледаме, пренесува локалниот портал Делчево365.

Гоцевски инаку е новоизбран градоначалник од редовите на ВМРО ДПМНЕ.

Во меѓувреме директорот на ЈП „Комунална хигиена“ Сабахадин Рустеми, кој е во притвор за несобирањето на ѓубрето во Скопје, си поднел оставка од функцијата. Неговиот адвокат Асмир Алиспахиќ синоќа по распитот во Кривичниот суд кажа дека Рустеми поднел оставка од морални причини.

Сега „Комунална хигиена“ нема директор и прашање е како ќе функционира претпријатието во наредните денови.

Градоначалничката Данела Арсовска вчера го повика премиерот Христијан Мицкоски да предложи негов кадар за нов директор на јавното претпријатие. Денеска Арсовска испрати соопштение до медиумите во кое ги повика новинарите да го прашаат премиерот Мицкоски како ќе функционира „Комунална хигиена“ бидејќи тој лично од својот кабинет го наредува овој хаос и го најави како интересна разврска на прес-конференција непосредно пред да се случи.

„Го повикуваме премиерот Мицкоски, кој има своја претседателка на Управен одбор од ВМРО, која воедно е и осуден криминалец за две кривични дела во 2006 и 2022 година, да го повика Управниот одбор на ‘Комунална хигиена‘ Скопје согласно член 24а, став 2 од Законот за јавни претпријатија да донесе одлука за разрешување на директорот и согласно став 3 од истиот член да именува вршител на должност на претпријатието. Мицкоски го тероризира градот со своето режимско и диктаторско владеење преку својот Управен одбор, злоупотребувајќи ги институциите и полицијата да сее страв и да врши репресија пред избори“, вели Арсовска.