Љубовна приказна како од роман – За Македонецот Владо и неговата љубов на животот пишува Си-ен-ен
Македонецот Владо Димовски и Полјачката Ига Олсак се запознале како тинејџери на одмор во Грција, но ја загубиле врската. Потоа, тие неочекувано се поврзале една деценија подоцна.
Нејзината тинејџерска љубов од летото неочекувано се врати во нејзиниот живот. „Се чувствував како повторно да се поврзувам со мојот најдобар пријател“. Години по тоа, Ига Олсак често размислуваше за моментот кога првпат го забележала Влад Димовски, на песочните брегови на Скотина, во Грција.
Ига имала 16 години, Влад имал 18. Тој се смеел со пријатели, а потоа ја поткренал долгата коса која му паѓала врз очите, и ги сретнал погледите на Ига, насмевнувајќи се.
МаркетингView this post on Instagram
Маркетинг
„Се сеќавам дека се чувствував многу возбудено заради него,“ раскажува Ига денес, за CNN Travel.
Ига првпат го видела Влад во летото 2005 година. Полјачката дошла во летен камп во Грција. Влад пак, доаѓал во Скотина секое лето од својот дом, кој денес се наоѓа во Северна Македонија. Плажата, под подножјето на Олимп, била негов втор дом, а тој секогаш бил опкружен со група пријатели.
Иако Ига била заинтересирана за Влад, била „и малку резервирана“. Првите неколку дена се обиколувале еден околу друг, но не разговарале.
Потоа, една вечер, Ига седела на плажата со своите пријатели од кампот, додека Влад седел близу, во одвоена група со своето друштво.
„Некако сите се најдовме да седиме заедно,“ се сеќава Ига. „Потоа Влад дојде до мене за да разговараме, и седнавме еден до друг на плажата, разговарајќи, водевме долг разговор. И така почна, од таму.“
Влад веднаш ја забележал Ига. Имаше „многу добри спомени“ од летата поминати на плажата во Скотина. Ја познавал секоја личност која тука доаѓала, а Ига се издвојувала. Се сеќава кога ја видел додека шетала по плажата, веднаш ја забележал и сакал да зборува со неа.
Кога конечно почнале да разговараат, Ига и Влад брзо станале неразделни.
„Секој ден го поминувавме заедно,“ се сеќава Ига. „На плажа, или шетајќи по планините, разговарајќи…“
Двајцата комуницирале на англиски – што било малку тешко за Ига затоа што не била толку сигурна во јазикот како што бил Влад.
„Но, Влад ми помагаше со некои зборови за да можеме подобро да комуницираме,“ вели Ига.
Ига и Влад ги поминаа следните две недели во заедничко друштво. Сеќавајќи се на тој период, Ига го опишува својот најсилен спомен како „чувство на сигурност“. Таа го сметала Влад за љубезен и забавен. Не била сосема вљубена – тие всушност биле само пријатели – но имала прилично силна симпатија.
И Влад се чувствувал исто. Тој ја опишува нивната врска како „пријателство, но и желба да бидат заедно“. Се чувствувал како да се привлечени еден од друг.
Но и Влад и Ига биле реални и знаеле дека оваа врска можеби нема да трае.
„Поминавме навистина одлично време,“ вели Ига. „Но, јас уште одев во средно училиште. Живеевме многу различни животи, бидејќи бевме во различни земји. Не постоеше начин да имаме заедничка иднина. Така што тоа е уште едно чувствтво – беше возбудливо, но и знаев дека тоа ќе има крај.“
Тој крај дошол многу брзо. Ига и Влад се збогувале кога кампувањето завршило. Социјалните мрежи биле уште во почетна фаза во 2005 година, но двајцата размениле адреси на електронска пошта.
По враќањето дома во Полска, Ига го „класификувала“ Влад во својата глава како „само пријател“.
„Но, дури и мојата мајка се сеќава колку бев возбудена кога го добив првиот негов имејл,“ вели Ига. „Ние ја продолживме таа комуникација во следните две години.“
Во тој период, Ига и Влад пишувале еден на друг за нивните размислувања за семејството, пријателите, патувањата, студиите, надежите и соништата.
„И двајцата имавме свои животи, но се чувствувавме поврзани,“ вели Ига. „Разменивме веројатно повеќе од 100 мејлови.“
„Не можев да дочекам да добијам имејл од неа,“ вели Влад. „Тие ми значеа многу.“
Двајцата пронашле и други начини да останат поврзани, вклучувајќи ја и комуникацијата преку смс пораки.
„Преземавме песни и ги слушавме истовремено,“ се сеќава Влад. „Потоа седевме цела ноќ, разговарајќи за песните со часови.“
Со текот на времето, Влад сфатил дека разговарал повеќе со Ига отколку со било кој од другите пријатели од летото – всушност, повеќе отколку со било кој во неговиот секојдневен живот.
И Ига го сфатила истото.
„Поминавме многу време разговарајќи и пишувајќи мејлови. Си испраќавме слики од тоа што се случува во нашите животи,“ се сеќава Ига, која често се враќала на фотографиите што ги направиле заедно летото, позирајќи заедно.
Понекогаш Ига и Влад ја размислувале идејата за повторно сретнување, но никогаш не се реализирале конкретни планови.
Со текот на времето, и Ига и Влад влегле во врски со други лица.
„После тоа, се чувствував како да не можам да се сретнам со него, бидејќи имам момче,“ се сеќава Ига. „Се чувствуваше дека имаме одлично пријателство, и навистина сакав да се сретнам со него повторно – но се чувствував заглавена, бидејќи не можев да го направам тоа.“
Како што нивните релации станувале посериозни, имејлите постепено се изгубиле.
„По некое време, едноставно престанавме да имаме контакт,“ вели Ига.
Но, Влад никогаш не ги избришал неговите имејли од Ига. Често мислел на неа.
Ига пак, секогаш се чувствувала благодарна за пријателството со Влад и тажна што тоа постепено исчезнало.
Кога Фејсбук станал многу достапен и сеопфатен, двајцата се поврзале повторно, таму. Комуницирале повремено – еднаш кога сфатиле дека се разминале еден со друг во Германија, а другпат кога Влад поставил фотографија од летото во Грција – но тоа допишување било повремено и на површно ниво.
„Губењето на контакт беше природно,“ размислува денес Влад. „Тоа оди со дистанцата.“
10 години подоцна
Времето поминало. Ига одела на факултет, дипломирала и се преселила од Полска во Германија. Таа се омажила, а потоа се развела во рок од една година. Бил тоа тежок период за неа.
Во меѓувреме, работата на Влад го одведе во САД, и тој се преселил таму во 2015 година. Влад го гледал ова селење како нов почеток по неодамнешното раскинување на врска.
„Си ветив себеси дека кога ќе одам во САД, нема да влезам во врска барем една година,“ се сеќава Влад.
Влад живеел и работел во Чикаго околу еден месец, кога, одеднаш, на неговиот телефон пристигнала порака. Била од Ига.
Таа поминувала низ Македонија и имала пауза на аеродромот, не многу далеку од родниот град на Влад. Оттаму му испратила смс порака, во случај да е во близина и да сака повторно да се видат. 10 години по првата средба.
Но Влад бил на другата страна на светот, во САД. Кога ја видел пораката на Ига, почувствувал од возбуда до разочарување за неколку минути, изненадувајќи се себеси колку многу тагува што ја пропуштил Ига.
Со неговиот искрен одговор – објаснувајќи дека се преселил во САД и изразувајќи желба да ја види Ига – започнала повторно размена на пораки помеѓу старите пријатели.
Пораките – исто како и нивните тинејџерски мејлови – брзо се продлабочиле. Ига и Влад започнале да разговараат секој ден, разменувајќи информации за нивните животи и пополнувајќи ги празнините во изминатата деценија.
„Брзо стана навистина интензивно,“ вели Ига. „Се чувствував како повторно да се поврзувам со мојот најдобар пријател, со некој многу драгоцен за мене.“
„Беше толку убаво и освежувачки да разговарам со Ига,“ вели Влад.
Ига зборувала за својот развод, а Влад спомнал дека и тој е „сингл“. Тие се чувствуваа поврзани – исто како што се чувствувале кога биле млади, иако никој не претпоставувал дека нивната врска има романтичен потенцијал.
Но, кога, на почетокот на 2016 година, Влад спомнал дека планира да патува назад во Европа за да ја посети својата фамилија, идејата дека може да застане во Германија да ја види Ига, речиси било нешто природно.
„Денот кога дојде да ме посети бев многу, многу, многу возбудена,“ вели Ига. „Се сеќавам дека му правев палачинки со банана. Станав во 5 наутро. Сакав да му направам појадок затоа што патуваше преку ноќ.“
Палачинките подготвени, Ига отишла на аеродромот да го сретне Влад.
„Моментот кога го видов повторно беше веројатно најдобриот ден во мојот живот,“ вели Ига. „Емоцијата беше навистина, навистина интензивна. Беше дури подобро отколку што го замислував.“
Влад се сеќава како бил преоптоварен од тоа колку необично било – а сепак се чувствувал убаво.
„Таа изгледаше неверојатно,“ се сеќава тој. Знаеше како изгледа Ига, ја видел на фотографии, но сфатил дека заборавил како е всушност да биде во нејзино друштво.
Двајцата се промениле. Биле на крајот на 20-тите години. И двајцата биле – и не биле – истите луѓе што биле пред една декада.
Ига му го покажала градот во кој живее, Билефелд, на северозападот од Германија.
„Беше многу разговорлива,“ вели Влад. „Прекрасно поминавме. Се гледаше дека нешто се случува. Беше краток период за да разбереме дали сме заедно или дали сакаме да изградиме врска. Но се чувствуваше дека е добро.“
Следни чекори
Додека Влад и Ига биле заедно во Германија, разговарале за можноста Ига да го посети Влад во САД.
Неколку недели подоцна, се поврзале преку видеоповик за да разговаараат за овој план.
„Знаев дека сум вљубена во Влад,“ вели таа. „Знаев дека сакам да бидам со него, но тој беше поскромен. Па се чувствував како да треба да знам, ‘Каде се наоѓаме ние?’“
Како некој кој поминал низ развод, добра комуникација била многу важна за Ига.
„Чувствував многу срам за тоа што ми се случи,“ вели таа.
Таа се отворила пред Влад за нејзината претходна врска, а тој ја сфатил и ја поддржил.
„Тој го создаде тој простор за мене во кој се чувствував навистина добро и конечно почувствував дека можам да ја кажам вистината,“ вели Ига.
Тоа била една од многуте причини зошто Ига се вљубила во него. Помислата дека тој може да не ги сподели истите чувства била болна. Но, Влад ја уверил дека тоа не е случај – воопшто не.
„Јас бев многу исплашен да не бидам повреден,“ вели Влад денес. Тој бил загрижен за реалноста на одржување на врска на далечина.
„Сакав да бидам со Ига. Но, се трудеев да живеам во моментот,“ објаснува Влад. Тој се плашел дека ако премногу брзо ги означат нештата, тоа може да ги измести. Но кога Ига ги изразила своите грижи, Влад ја уверил дека ја сака и тој, и изјавил дека сака да се обиде да ја направат нивната врска да функционира.
Така Ига го резервирала својот авионски билет да го посети Влад во Чикаго неколку месеци подоцна.
Таа посета била пресвртна точка.
„Во тој момент, бевме многу сериозни,“ вели Ига.
Во мај 2016 година, Ига се одлучила да се пресели во САД на подолг рок. Таа си ветила дека ако не успее, може да се врати во Европа.
Но, и таа и Влад сакале да ѝ дадат шанса на врската, па Ига поднела барање за работна виза која ќе ѝ овозможи да живее во САД подолго.
Родителите на Ига ја охрабрувале.
„Имав целосна поддршка од моите родители, и тие беа многу возбудени за мене,“ вели Ига. „Но, мојот брат беше многу анксиозен, како, ‘О боже, го запознаваш преку интернет.’“
Развивање стабилна врска
Ига и Влад само се повеќе се увериле дека се наменети еден за друг како што поминувале месеците.
„Развивме одлична, стабилна и силна врска,“ вели Ига. „Почнавме да зависиме еден од друг. Се имавме само еден со друг во нашите животи во САД. Немавме никаква фамилија таму, ни јас, ни Влад, така што го создадовме тој мал простор заедно.“
Ига започнала да ги поставува темелите за својата бизнис идеја за животно советување. Парот се преселил од Чикаго во Флорида, но потоа повторно се вратиле во Чикаго. Тогаш Ига открила дека е бремена.
Децата беа нешто што и Ига и Влад го сакаа, а разговарале уште на почетокот за тоа, но бременоста на Ига беила неочекувана. Тоа било убаво изненадување за двајцата.
На половина од бременоста на Ига, бабата на Влад починала и тој морал да се врати назад во Македонија.
Додека го чекал летот, Влад размислувал за животот, загубата и за љубовта. Неговите баба и дедо имале голема романса, каква тој секогаш посакувал за себе.
„Тие беа пример за вистинска љубов за мене,“ вели Влад.
Влад знаел дека сака да го помине остатокот од својот живот со Ига. Размислувајќи за нивното прво запознавање на плажата во Грција, почнал да размислува за една идеја.
„Сакав да се оженам во Грција,“ вели тој. Потоа, се јавил на пријател и побарал да му го позајми неговиот автомобил, објаснувајќи дека има план. Пријателот пак, му понудил да го одвезе Влад до плажата во Скотина.
„Така јас, пријателот, неговата девојка и мојот брат, се возевме до таму,“ вели Влад. „Беше септември, вон сезона. Отидов до местото каде што Ига и јас се запознавме и снимив видео.“
Во видеото, Влад зборувал директно пред камерата, раскажувајќи за нивното прво запознавање кога биле тинејџери. Раскажал и како се чувствувал кога повторно се сретнале по десет години. Колку му значела Ига. Зборувал и за неговата возбуда поради нивното идно дете. Неговите надежи за нивната иднина.
„Потоа ги напишав, на песокот, зборовите: ‘Ќе се ожениш ли со мене?’“ се сеќава Влад.
View this post on Instagram
Потоа, кога се вратил во САД, Влад ја однел Ига на вечера, побарал поинтимна маса во ресторанот, го извадил својот телефон, го вклучил видеото снимено од Грција…
Ига многу се разнежнила кога ја видела повторно плажата и била допрена од зборовите на Влад на екранот.
„Потоа, на крајот, ја видов плажата каде тој напишал: ‘Ќе се ожениш ли со мене?’“ се сеќава Ига. „Јас само почнав да плачам. А потоа ми го даде прстенот.“
Влад исто така ѝ напишал писмо на Ига – бил инспириран од времето поминато дома и спомените за неговиот дедо „кој секогаш пишуваше писма и белешки за тоа како се чувствувал“.
Во писмото на Влад до Ига, тој опишал колку е важна таа за него и како се чувствувал кога ја посетил плажата каде се запознале, по сите овие години.
Некои од работите што ги напишал, тој никогаш не ѝ ги рекол на Ига претходно – како се чувствувал во моментот кога првпат ја видел. Начинот на кој ја паметел како оди по песокот. Како ги зачувал сите нивни мејлови.
„Беше толку убаво и романтично,“ вели Ига. „И потоа ова убаво видео на плажа, а Грција е толку симболична за нас…“
Ига и Влад го пречекале нивниот син, Лука, во 2018 година. Парот се оженил еден месец подоцна – со мала церемонија, во друштво на нивните најблиски роднини, а подоцна го пречекале второто дете, ќерката Клара.
Денес, Ига и Влад чувствуваат дека сè се случило како што требало.
View this post on Instagram
„Јас обично не верувам во тие работи, во судбина“, вели Влад. „Но, со сето она низ кое минавме, а потоа и сè што не доведен еден кон друг – не можам да верувам дека тоа не ни беше наменето токму така да биде“.
