Лековита бања со багатела цени на само 1 час од Скопје – чудесна вода, кал и гас против болки и за „бајче“ нерви

Многу туристи и љубители на бањите сè уште не чуле за Бујановачка Бања, која се наоѓа на само 13 километри од Врање и во непосредна близина на градот Бујановац, Србија.

Сместена на надморска височина од 400 метри во долината на Јужна Морава, ова лекувалиште е вистинска дестинација за оние кои бараат природни лековити ресурси, релаксација и современи медицински третмани.

Advertisement

Бањата е позната по својата лековита вода, вулканска кал и гас CO₂, кои се користат за третман на широк спектар на здравствени проблеми. Тие се ефикасни за лекување на реуматски и дегенеративни болести, како хроничен реуматизам, артроза, спондилоза, болки во грбот, во зглобови и дископатија, помага во лекување на лекува дегенеративни промени во мускулите и тетивите, воспалителен артритис, стадиуми на ремисија, понатаму, лекува кожни заболувања (егзема, псоријаза, акни и други хронични состојби на кожата), но позната е и по чудесното дејство за оние кои имаат гинеколошки проблеми, од менструални болки, состојби по породување и други женски здравствени проблеми.

Многумина се сведоци дека оттаму се враќаат мирни и дека спијат како „бајче“, зашто третманите помагаат за отстранување на невролошките нарушувања, како болки во нервите, ишијалгија, периферни и последици од повреди на нервниот систем.

Освен тоа, во Центарот за рехабилитација на бањата се нудат и третмани за после повреди и операции: рехабилитација на крвни садови, закрепнување на мускулите и зглобовите, намалување на болката и подобрување на подвижноста.

Да не зборуваме за општата релаксација и детоксикација, од подобрување на циркулацијата, намалување на стресот, подобрување на тонусот на кожата и мускулите.

Во бањата се нудат хидротерапија, подводна масажа, палеоидна терапија, гасна терапија со поткожни инјекции, електротерапија, кинези терапија, сауна и мануелна масажа.

Секој третман е прилагоден индивидуално од специјалист за најдобри резултати, а комбинацијата на различни методи помага за целосно закрепнување и подобрување на здравјето.

Цените за дневен одмор во бањата се навистина пристојни. Дневен одмор, од 10 до 18 часот, чини само 950 денари, болнички ден со терапија и полупансион чини неверојатни 2.315 денари, а со терапија и со полн пансион околу 2900 денари.

Овие цени ја прават Бујановачка Бања достапна и економична опција за сите кои сакаат да уживаат во природните лековити ресурси и да се опуштат во мирна, природна и волшебно убава средина.

Околината на Бујановачка Бања нуди многу можности за излети и културни активности. Манастирот Свети Прохор Пчињски од 11 век е историска атракција, сместен во живописна шума и планински предел.

Археолошките локалитети од средниот век нудат увид во богата историја на регионот, додека планината Рујан е одлична за прошетки, велосипедизам и уживање во природата. Прекрасната долина на Пчиња нуди мирни патеки, езерца и места за пикник, а љубителите на фотографија ќе уживаат во пејзажите со зелени падини и планински врвови.

Гурманите ќе уживаат во автентични локални специјалитети. Местата околу Бањата се познати по јадења како печено месо на скара, традиционални сарми, домашен кајмак, сирења и урда, како и свежо приготвени јадења со локален зеленчук и билки.

Во рестораните и гостилниците можат да се пробаат и локални десерти како баклава и мед од планината Рујан. За љубителите на вино, регионот нуди домашни вина и ракија направена од локални овошја.

Бујановачка Бања е лесно достапна преку автопатот Е-10 кој го поврзува Белград со Скопје. Од Скопје е околу еден час возење, што ја прави совршена дестинација за еднодневен или викенд излет.

Посетителите можат да уживаат во лековитата вода и кал, да се релаксираат во бањата, да ја истражуваат природата, да ја почувствуваат историјата и да уживаат во локалната кујна.

Накусо, оваа бања е скриено богатство на југот на Србија кое вреди да се посети.