Кристално море, ниски цени – еве кои туристи, колку плаќаат и зошто летуваат во Албанија, а Македонците еве каде се на листата!
Косовците први, Италијанците се враќаат, а Македонците се верни посетители. Цените растат, но интересот за одмор во Албанија е поголем од кога било.
Албанското приморје во последните две години доживува вистински туристички бум, а официјалните податоци од албанските институции и странските туристички оператори покажуваат дека 2024 била рекордна по бројот на гости, додека 2025 ја продолжува истата линија на раст, па дури е и „посилна“ од лани.
Најмногу посетители и понатаму доаѓаат од Косово, кое убедливо го држи првото место на листата. Само во периодот од јануари до август 2024 година, регистрирани се над 3,38 милиони влезови на косовски државјани, што е раст од 15,2 проценти во однос на претходната година.
Веднаш по Косово, најбројни се Италијанците, чие присуство е особено забележливо во јужните делови на Албанија. Во истиот период, над 892 илјади туристи од Италија пристигнале на албанските плажи, најчесто преку траекти кон Валона и Драч.
Во летните месеци на 2025 година, само во еден ден во пристаништето во Валона се бележат над 600 туристи пристигнати од Италија.
На третото место се туристите од Македонија, со стабилен пораст и над 625 илјади влезови во првите осум месеци од 2025 година, што претставува зголемување од 22 проценти.
Advertisement
Значаен е и растот на туристите од Полска, Чешка, Обединетото Кралство, Германија и Франција, особено на јужната ривиера, каде групните чартер-аранжмани и авионските линии овозможуваат полесен пристап.
Турција и Франција бележат најголем процентуален скок – 75,7, односно 65 проценти повеќе во август 2024 во споредба со истиот месец во 2023 година.
Северот на Албанија ги привлекува соседите
Кога станува збор за изборот на дестинации, се забележува јасна поделба на пазарите. Северните крајбрежни градови како Драч, Голем, Шенѓин и Велипоја остануваат прв избор за косовските и македонските семејства.
Близината, добрата патна поврзаност и силната понуда на „all inclusive“ хотели се клучни причини за нивната популарност. Постојаните автобуски линии и промотивните пакет-аранжмани од косовските тур-оператори ги држат овие локации високо на листата на најбарани.
Цените во овие дестинации, особено во пикот на сезоната, се движат меѓу 75 и 110 евра по лице за ноќевање со целосна услуга (ол-инклузив).
На пример, хотелите во Драч како Bonita Classic и AMH Hotel во август нудат цени од 75 до 89 евра, додека објекти од повисока категорија како Premium Beach достигнуваат и до 142 евра (со се вклучено).
Во Шенѓин, хотелите со четири ѕвезди нудат полупансион по 50 до 60 евра по лице, а со доплата е можно и зголемување на услугата на целосен пансион или „all inclusive“.
Југот привлекува меѓународна публика
Јужната ривиера, односно Валона, Химара, Саранда и Ксамил, се центар на интерес за туристите од Италија, Полска, Чешка, но и за Британците, Французите и Германците.
Италијанците пристигнуваат со траекти, додека централноевропските гости често доаѓаат преку групни аранжмани и нискобуџетни авиолинии.
Во Ксамил и Саранда, цените се разновидни во зависност од локацијата и категоријата на сместување. За помали хотели и апартмани, цените во јули и август се движат од 35 до 60 евра по лице со ноќевање или полупансион, додека средната класа се движи од 70 до 120 евра.
Во врвната категорија, цените можат да надминат 120 евра, особено во луксузни ресорти со приватни плажи и дополнителни погодности.
Во многу случаи, лежалките и чадорите на хотелските плажи се вклучени во цената, додека на јавните плажи чинат од 10 до 20 евра по сет.
Потрошувачката по турист расте, што е показател за сè поголемата подготвеност на посетителите да платат за квалитет. Во првиот квартал на 2025 година, просечната потрошувачка по лице изнесувала околу 537 евра, што е пораст во однос на 513 евра во истиот период претходната година.
Туристичкиот сектор во Албанија, со стабилниот раст на бројот на гости и порастот на трошоците по посетител, влегува во нова фаза на развој. Северот продолжува да биде главна летна база за соседните земји, додека југот се отвора кон пошироката европска публика. Цените растат, но интересот останува висок – знак дека албанското приморје станува сè посериозен играч на медитеранската туристичка сцена.
