Конечно ја погледнавме нашата нова серија и се воодушевивме од фантастичната глума на повеќето актери. Браво!
Одлична серија!
Пред неколку недели на Канал 5 телевизија беше премиерата на новата македонска серија Фамилијата Марковски. Станува збор за една симпатична серија инспирирана од вистински настан и трагикомичната општествена ситуација во која што живееме. Семејството Марковски покрај егзистенцијалните проблеми се соочува и со репресија од страна на системот, а тука се и нивните животни приказни испреплетени со љубовни проблеми, морални небулози и сл. Серијата има за цел да ги постави во преден план големите и тешките теми кои се дел од нашето општество – крајната политизираност, но и како заедницата реагира на проблемите што ги има геј популацијата и хомофобијата. Оваа проблематика се појавува дури во четвртата епизода, но според нас, некако е пренагласена, целата ситуација е до тој степен суптилно опишана, непотребно, што најверојатно и предизвика негативен фидбек на социјалните мрежи и тоа најмногу кај оние кај кои требаше да поентира!
Но она што мораме да го признаеме е генијалната актерка игра – тие одлично се снаоѓаат во своите улоги. Ова особено важи за Сашко Коцев кој го игра бескрупулозниот млад бизнисмен кој гази врз живи луѓе за да се збогати, како и за Тамара Ристовска која со својот специфичен шарм веднаш ги стекна симпатиите на нашата публика. Немаме замерка ни за сите останати актери, но како што веќе рековме, она што нам ни пречи е бавното дејствие, и пренагласената интенција да се остави реалистичен впечаток што наместо оној „feel good“ момент што треба да го доживеете по гледање на една добра серија (како на пример американската серија „Shamless“ во која само во една епизода има повеќе заплети отколку во целиот живот на било кој од Марковски), доживувате некаква горчина, како да сте изеле нешто расипано од вашиот празен фрижидер. Најверојатно од тука и таквиот впечаток откако ги изгледавме првите четири епизоди (целата серија се уште ја немаме гледано!), така што искрено се надеваме дека во наредните епизоди ќе не освои повторно со дијагностицирање на вистинските проблеми во нашето болно општество, иако сценариото е по малку.. македонско!
Токму затоа и ја препорачуваме на сите, а олеснителна околност е и тоа што сите епизоди можете да ги најдете на Јутјуб и да ги гледате.
{youtube}QDYUPfWA2lw{/youtube}
Па, време е за пуканки и.. Фамилијата Марковски!
