Велат дека е потребно цело село за да се одгледа едно дете, а тоа посебно важи за Рис Џејмс и неговата партнерка Грејс, кои неодамна го добија својот син Вини.
Овој тримесечен херој е роден со исклучително ретката дијагноза – Голденхаров синдром, кој влијае на неговото лице, срце и дишење.
Неочекувана дијагноза
За време на бременоста, ништо не укажувало дека нивното бебе ќе се роди со оваа ретка болест. Кога Вини го здогледал светот, родителите доживеале огромен шок.
„Кога се роди, тој не дишеше“, се сеќава таткото Рис Џејмс. „Толку брзо го однесоа што не знаев што да правам. Отидов во тоалет и почнав да се молам“, признава тој.
Кога за првпат го видел својот син, забележал нешто што никогаш не очекувал.
„Видов мало уво на неговиот десен образ. Бев збунет и шокиран. Не знаев што се случува“, раскажува таткото, кој во тој момент сфатил дека нивниот живот засекогаш ќе се промени.
Борбата на едно семејство
Голденхаровиот синдром значи дека Вини е роден само со едно око, мала вилица и уво кое е поставено на неговиот образ. Но, родителите веднаш решиле дека ќе му пружат љубов и поддршка без разлика на предизвиците.
„За повеќето луѓе ова би било голема работа, но она што е внатре е она што се брои. Неговата душа е совршена“, со гордост вели таткото Рис.
Поддршка од заедницата и собирање средства
За да можат да ги покријат патувањата до Лондон, каде што се надеваат дека Вини ќе добие око-протеза, преку Интернет биле собрани повеќе од 3.500 фунти.
„Веројатно ќе бевме во долгови да не беа овие донации“, вели Рис, кој истакнува дека семејството поминува многу време во болницата Great Ormond Street во Лондон, каде што нивниот син добива специјализирана нега.
Најголема поддршка дошла од црквата, која им помогнала да се справат со тешките моменти.
-Сестрата Маја – таа е неговиот најголем заштитник
Вини има шестгодишна сестра, Маја, која веќе покажува голема грижа за него. „Таа учи како да се грижи за него, набљудува и разбира. Таа е неверојатно внимателна“, споделува таткото.
Кога Вини се родил, Маја имала многу прашања, но брзо сфатила што значи неговата состојба и сега не го гледа поразлично од другите деца.
Малото бебе што инспирира илјадници луѓе
И покрај сите предизвици, Рис и Грејс се решени да ја споделат приказната на Вини со светот. „Тој веќе ги менува животите на многу луѓе, вклучувајќи ги и нашите. Тој ги спојува луѓето“, вели Рис.
„Веќе има свој шарм“, додава тој со насмевка. „Сакам луѓето да се инспирираат од него.“
