„Ќе те чувам сè додека сум жив“ – најдобриот другар на Тоше со срцепарателна порака

Денес, 16 октомври 2025 година, се навршуваат точно 18 години од трагичната сообраќајна несреќа кај Нова Градишка, во која животот го загуби Тоше Проески – човекот со ангелски глас и срце што ширеше љубов.

Веќе речиси две децении, неговите најблиски, пријателите, соработниците и илјадници фанови од целиот регион го одбележуваат овој датум со тага и благодарност, сеќавајќи се на момчето кое замина на само 26 години, но остави зад себе наследство поголемо од животот.

Сепак, најголемата болка ја чувствуваат оние што беа најблиску до него – оние со кои Тоше ги делеше секојдневието, соништата и смеата. Еден од нив е неговиот најдобар пријател од детството, Стерули Штерјоски, кој секоја година на овој ден му упатува порака што ја крева на нозе целата јавност.

И годинава, еден ден пред годишнината, Стерули на своето инстаграм-стори објави фотографија од гробот на Тоше, а денес сподели неколку заеднички фотографии и зборови што тешко се читаат без солзи:

„Те чувам секој ден, 365 дена во годината. И така веќе 18 години. Ќе те чувам сè додека сум жив. Многу фалиш, братче.“

Advertisement