Каде се бере македонскиот женшен – „царицата на горчливите билки“ ќе ви го среди здравјето од корен
Еве зошто е „царица на горчливите билки“ и злато од планината.
Линцурата (Gentiana lutea), кај народот позната и како македонски женшен, е една од најценетите планински билки на Балканот.
Нејзината лековитост е позната уште од античко време, а денес сѐ почесто е предмет на интерес од страна на билкари, фармацевти и луѓе кои се враќаат кон природната медицина.
Advertisement
Каде расте линцурата?
Во Македонија имаме од оваа златна билка. Линцурата најчесто се среќава на надморска височина од 1 000 до 2 000 метри, на сончеви ливади и каменити падини.
Во Македонија, оваа билка природно расте на неколку планини: на Шар Планина – посебно во пределот околу Лешница и Вруток, на Кораб – на поголеми височини каде има чиста, недопрена природа, Бистра – особено во близина на Галичник, Баба Планина – во регионот околу Пелистер и Дихово и на Јабланица – во регионот над селото Вишни и Горна Белица.
Во овие предели, линцурата расте спонтано, но поради прекумерно берење, во некои региони е под заштита и се собира само со дозвола.
Што лекува линцурата?
Линцурата е позната по своето силно дејство врз дигестивниот систем. Коренот, кој се собира обично на есен, содржи горчливи материи кои ја поттикнуваат работата на желудникот, го подобруваат апетитот и го олеснуваат варењето. Освен тоа: помага при анемија и исцрпеност, ги поттикнува функциите на црниот дроб, има антибактериско и антивоспалително дејство, го зајакнува имуниот систем, а традиционално се користи и како природен тоник.
Сличностите со женшенот
Иако потекнуваат од различни делови на светот, линцурата и азискиот женшен имаат многу сличности:
и двата се користат како тоници за енергија и сила
помагаат при замор, слабост и општа исцрпеност
имаат антиоксидантно дејство
поддржуваат подобра циркулација и работа на внатрешните органи
Разликата е во тоа што женшенот (Panax ginseng) повеќе се користи за ментална јасност, подобрување на фокус и хормонална рамнотежа, додека линцурата е позната како „царица на горчливите билки“ и главно се користи за желудочни тегоби и општо зајакнување на организмот, телото и имунитетот.
Традиција и современост
Во некои западни земји линцурата се користи како основа за аперитиви и алкохолни екстракти, додека во Македонија се уште најчесто се употребува како чај или тинктура (екстракт/сируп за лекување). Билкарите предупредуваат дека не треба да се користи без консултација со стручно лице, особено кај лица со висок крвен притисок или чир на желудник.
