Јулија со емотивен настан во чест на ќерка си – три години без уметницата, но не и без нејзиното присуство
Во Прилеп се одржа настанот насловен „Љубов за сите“, во чест на уметницата Андријана Мациев, која ја загуби борбата со ракот пред три години.
Во понеделникот вечерта, во преполната сала на Културниот дом „Марко Цепенков“ во Прилеп, се одржа емотивна манифестација насловена „Љубов за сите“, посветена на ликот и делото на македонската академска уметница Андријана Мациев, три години откако уметницата ја загуби битката со ракот. Организатор на настанот беше нејзината мајка Јулија, позната пејачка и водителка.
Публиката имаше можност да ја почувствува енергијата на Андријана преку изложбата на 22 нејзини ликовни дела, но и преку промоцијата на двата алманаха што ја носат истата порака – љубов, светлина и уметност. Настанот беше збогатен со богата културно-уметничка програма, исполнета со музика, зборови и емоции кои ги разнежнија и допреа срцата на присутните.
Пејачката и водителка Јулија, мајка на Андријана, со голема искреност и силна љубов, го водеше настанот посветен на нејзината ќерка, пренесувајќи ја болката, но и светлината што ја оставила Андријана зад себе. Преку нејзините зборови, слики и преку песни, беше почувствувано и апстрактното, но моќно присуство на уметницата.
Особена благодарност беше упатена до тимот на Домот на културата, сите учесници во програмата и прилипската публика, која до последното столче ја исполни салата и со топлина ја прегрна оваа посебна вечер.
„Љубов за сите“ не беше само манифестација – беше чин на живо сеќавање, на споделена тага, но и на благодарност што некои души, и по заминувањето, продолжуваат да не инспирираат.
