Ако сте љубител на француски вина и француски жени, тогаш размислете како во текот на годиниве да соберете доволно кеш и за оваа убавица со потписот Made in France.
Верувајте на напишаното, на фотките е Citroën, а според нашето нималку нескромно мислење: најубав на сите времиња. Најпрво мислевме овој пост да му го посветиме на неговиот наследник, лани претставениот DS 5, но кога подобро размисливме, се решивме за концептуалниот модел sportive-tourera, од ’bastard‘ класата, позади која се крие караван вулгарис, но со динамични линии и спортска појава.
Прекрасната GT каросерија прима четворица луѓе и еден куп багаж, со минимален отпор на воздух и целосно спортски перформанси. Главната битка на пазарот, требаше да ја води против редизејнираната Alfa Sportswagon, затоа што и тогаш не беше реално да се очекува напад на супериорниот R модел на Mercedes, со слични карактеристики.
Велиме ’требаше‘, затоа што од необјасниви причини, Французите никогаш не го пуштија овој модел во сериско производство. Иако, кога прв пат како концепт го претставија во 2005 година, најавија дека до крајот на 2007 треба да се појави во салоните. На жалост, до денес се уште нема ни трага од него во продажните места. Но тоа, сепак, не е причина ние да не ви го претставиме, нели?
Врати се на првата страна.
