Уште од дете била вљубена во разновидноста на боите, во цртањето, во сѐ што ја претставува уметноста.
„Моите дланки ја имаат таа умешност да бидат креативни да цртаат на платно, едноставно, сите сме родени со некоја дарба“ – вели мејк-ап артистката и стилистка Мери на почетокот на разговорот, навраќајќи се назад во минатото, и продолжува:
„Веројатно тоа значи остварување на мојот детски сон. Нурнување во самата себе, себепреслушување. Тоа е одговор на еден внатрешен глас кој постојано ме потсетуваше дека уживам во уметноста, во сѐ што е убаво. Уште како мало девојче сакав да играм со бои. Најпрво на лист хартија, а подоцна и на платно. Цртав женски ликови и ги разубавував со шаренилото на боите“.
И денес, по толку изминато време, Мери Бајрамовска ужива разубавувајќи ги нашите дами, но овојпат со шминка, извлекувајќи го најубавото од нив.
„Шминкањето е моја пасија, моето „јас““ , нагласува таа.
Како се најде твоето име во Дејли меил, Гламур Париз, Космополитан и други светски списанија и портали?
Ја имав таа привилегија за мене да пишуваат светски реномирани медиумски куќи како што се: Дејли меил (линк од написот – ТУКА и ТУКА) Космополитан (линк од написот – ТУКА), Ју-ес магазин (линк од написот – ТУКА), Билд, Космополитан, Гламур Париз, Алур (линк од написот – ТУКА), Селф (линк од написот – ТУКА), Попшугар (линк од написот – ТУКА), и други еминентни списанија, а моите видеа беа прикажани и на неколку телевизии, меѓу кои и турската Tv8.
Моите мејкап трансформации денес се сензација на социјалните мрежи Инстаграм, Фејсбук, а дел од нив станаа вирални.
Кој од познатите личности што си ги нашминкала ти оставил најголем впечаток и зошто?
Годинава се навршува 14-та година од отворањето на „Makeup by Meri“. Во студиото биле Наташа Беквалац, Јелена Томашевиќ, Теа Таировиќ, Александра Матрих, Јелена Бачиќ Алипчиќ, Каролина Гочева, Тамара Тодевска, Викторија Лоба, Антониа Гиговска, Лина Пејоска, Андријана Петрушовска, Барабара Поповиќ, Наташа Малинкова, Дани Димитровска, Ирена Спироска, Марија од „Eye Cue“, Сара Гигова, Елена Велеска, Сузана Гавазова, Соња Трчуловска, Мелани Трчуловска, Александра Јанева, Стојне Николова, Анета Накова, Софија Манева…
А од познатите мажи, Влатко Лозаноски, Ристе Ристески, Ѓоко Танески… Сите тие добиваат еднаков третман. Односно, се трудам да ги разубавам максимално.
Искрено да ви кажам, не можам да издвојам кој ми оставил најголем впечаток зашто сите на свој начин ми оставиле посебен впечаток кој се издвојувал од останатите.
Друга димензија добиваме додека ги гледаме на концерити или пред малите екрани, а сосема друга димензија се во живо и кога почнуваш да имаш комуникација со нив. Ми се допаѓа тоа што се многу природни и спонтани со мене додека ги шминкам.
Дали некогаш си одбила да нашминкаш некого и зошто?
– До сега во 14-годишно искуство не ми се случило да обијам некого за шминкање.
Отворена сум за соработка за сите, и можам да бидам соговорник со сите.
Како реагираш кога клиентка инсистира на шминка што според тебе не ѝ одговара? Ќе ја исполниш нејзината желба или ќе ја одвратиш?
– На ликовен уметник, изработувач на фрескоживопис, на мозаист, не му е тешко да му даде живот на материјалот на кој работи, затоа што тоа го прави со љубов. Истото се случува и со шминкањето. Ја почитувам желбата на килиентот.
Го цртате ликот за да го разубавите, трошите многу енергија, но штом ќе здогледате радосни очи, искрена насмевка и топло ‘благодарам’, како да оживувате повторно и настојувате секој следен пат да бидете подобри во „својата креација“.
А дека сте навистина добри потврдуваат клиентите кои поворно и повторно доаѓаат за шминка. Добивате фидбек од другата страна, а тоа се задоволни и убави лица.
Секако дека ја почитувам желбата на клиентот. Тоа е и замислата на услугата која ја давам, на крајот да имам задоволен клиент.
Која е најлудата или најбизарната желба што ти ја побарала некоја позната личност како клиентка?
– Работата со луѓе значи средба со различни карактери, вкусови, чувство за убавина, темперамент, различни очекувања и погледи. Toa и ја одредува тежината на работата. Сепак, на крај успеваме да се ускладиме како најдобро треба да изгледа ликот што се шминка. Досега не ми се случило некој да побара или да има најбизарна желба за шминка.
Дали некој клиент се обидел да не ти плати со оправдување дека е „инфлуенсер“ или позната личност?
– Чест и задоволство ми е што од познатите личности ме одбрале токму мене за да ми ја дадат довербата, да имаат можност да ги нашминкам. Не го гледам тоа како профит, туку како привилегија!
Се вели дека добрата шминка може да направи магија, но дали некогаш си морала да „спасуваш“ нечиј изглед по катастрофална козметичка интервенција?
– Честопати ми се случува да дојдат расплачени невести или матурантки токму од претходно промашена шминка.
Не е доволна само моќта на дланките и умешноста на оној што шминка туку и квалитетот на производите што се користат. Јас никогаш не сум штедела на квалитетна шминка, затоа што знам дека квалитетот секогаш ќе ги враќа дамите кај мене.
Користам најреномирани брендови кои се движат со репутација за иновации, софистицираност и супериорен квалитет на ниво на престиж на ултрапремиум луксуз: од M.A.C, Urban Decay, Estée Lauder, Bobbie Brown, Make Up For Ever, Sephora до Lancôme и Anastasia, Beverly Hills , Kiko Milano, Тhe Balm Cosmetics , Tarte Cosmetics, Too Faced и многу други брендови кои се синоним во целиот свет дека шминката претставува уметност за талентирани уметници, со стил, чија елеганција ги красат страниците на сите водечки списанија и со кој се достигнува врвот во козметичката уметност.
Токму затоа одбрав да работам со високо квалитетни фирми, бидејќи сметам дека секоја жена го заслужува најдоброто.
Каква шминка е актуелна за сезоната пролет/лето 2025?
– Секоја промена во сезоната го поздравува напливот на трендови за шминкање кои создаваат совршена можност да ја надградите вашата рутина за убавина.
Со доаѓањето на пролетта, преминот кон потопло време, доаѓаат и нијанси на розова боја, свежо лице и едноставно шминкање на очите.
Оваа година, гледаме дека многу од нашите омилени трендови од изминатата сезона кои добиваат обнова – со промена кон леснотија и едноставност. Од нежни веѓи до супер руменило до тоа како да се контурирате, трендовите во шминкањето пролет 2025 ја искористуваат моќта на природната убавина и ја нагласуваат идејата дека помалку е повеќе.
