Има 101 година и сè уште работи 6 дена во неделата: „Ќе умрам ако се пензионирам“
Ан Анџелети, 101-годишна баба од Њу Џерси, ги надминува сите очекувања. Иако треба да ужива во пензионерските денови, таа сè уште работи шест дена во неделата.
Како што вели, таа сè уште работи во својата продавница за накит и често патува во познатиот дијамантски кварт во Њујорк. За неа, тоа не е обврска, туку начин на живот и, вели таа, работата е она што ја прави жива.
„Ќе умрам ако се пензионирам. Тоа значи дека не можам да останам дома“, изјави таа за „ABC 7“.
А која е тајната на долговечноста?
Според Ана, тајната лежи во грижата за себе. „Мора да станеш, мора да се истушираш, мора да јадеш, мора да се грижиш за себе. Мора да вежбаш. Ако не ти се допаѓа работата, смени ја“, рече таа.
Таа почнала да работи и да заработува за живот уште од рана возраст. Го напуштила училиштето за да работи во продавницата за стоки на нејзиното семејство во Бруклин.
Кога нејзиниот сопруг заминал во Втората светска војна, таа се вработила во бродоградилиште, а подоцна работела како келнерка.
Приказната на Ан Анџелети е дел од поширок демографски тренд. Во Њу Џерси, каде што живее, има приближно 2.646 луѓе над 100 години. Хаваи има највисок процент на стогодишници во Соединетите Американски Држави.
Слични трендови се забележуваат и во други делови од светот. Јапонија неодамна постави нов рекорд по 55-та година по ред, со речиси 100.000 жители над 100 години, од кои 88 проценти се жени.
