Забавувајте се со вашите деца и направете вкусен и здрав десерт кој сигурно ќе ги воодушеви сите членови на семејството или вашите гости!
Во овој период се уште има изобилство од здраво и вкусно свежо овошје. Овошјето е одличен избор (посебно ако ви се јаде благо) за крајот на летото, кога температурите се сé уште високи па со него ќе се освежите, а воедно ќе ви помогне и да се снабдите со витамини и да го зачувате имунитетот и доброто здравје.
Многу луѓе со задоволство јадат лубеница, диња и праски во топлите денови. Тие се вкусни, сочни, слатки и полни со вода, но не мора да ги јадете на вообичаениот начин. За крајот на летото би ви препорачале да пробате еден интересен начин како да се освежите со помош на овие намирници – направете овошни ражничи!
Се што ви е потребно се стапчиња за ражничи и овошје кое што го сакате. Колку повеќе видови, тоа подобро и пошарено, а палетата на различни вкусови ќе ве воодушеви. Исечете го овошјето по избор на коцки, наредете на стапчиња и послужете на семејството, пријателите, гостите…
Можете да користите што сакате – боровинки, малини, капини, диња, праска, лубеница, портокал, јаболко, грозје, банани, киви, ананас, лимон… сè што сакате или имате дома. Бидете креативни па исечете го овошјето во различни облици со помош на модели, за што поради структурата најдобар избор ви се дињата и лубеницата. По желба, можете да ги послужите со убав и вкусен сладолед или кога температурите ќе паднат, да ги прелиете со (овошен) јогурт.
Забавувајте се и играјте се со вкусовите, наредете ги на чинија и послужете ги во друштво, сите ќе бидат воодушевени.
