Езерото замолкна, а сирените на бродовите ја разбудија тагата и љубовта – овој град не го заборави Тоше (видео)

И годинава, Охрид не го заборави Тоше Проески. Во знак на сеќавање на човекот со ангелски глас, точно напладне од градското пристаниште се огласија сирените на бродот „Армада“, додека во позадина тивко одекнуваше неговата песна „Боже, чувај ја од зло“.

Традиционалниот настан, кој се одржува по иницијатива на Лајанс клубот Лихнидос и бродот „Армада“, уште еднаш потсети дека времето не може да ја избрише љубовта и почитта кон Тоше.

За  потсетување, вчера се навршија 18 години од трагичната несреќа во која Македонија го изгуби својот најсакан пејач, но неговиот лик, глас и добрината што ја ширеше остануваат дел од сите нас. Во Охрид, градот кој многу го сакаше, денес сè уште се чувствува неговата присутност, во секој звук на езерото, во секоја песна што тивко се слуша, и во секое срце што се сеќава.

Тоше останува симбол на човечност, љубов и светлина, траен белег на едно време што никогаш нема да избледи.