Едноставен трик како да ја исправите косата без пегла и фенирање

За да ја исправите косата не морате да ја изложувате на топлината од пеглата или фенот, можете да го направите тоа само со помош на ластичиња за коса. Прочитајте како.

Најпрво измијте ја косата на вообичаениот начин. Треба косата да биде влажна за да успее исправувањето, па затоа овој трик е одличен за пролетните и летните денови.

По миењето, малку засушете ја косата, особено коренот на влакната што треба да биде потполно сув.

Земете неколку гумички – наш совет е да бидат меки и подебели, да не оставаат траги на ксоата и да не ја притискаат премногу.

Доколку имате густа коса, поделете ја на два дела, а ако не можете така соберете ја целата.

Соберете една половина во ниска опашка и врзете ја со ластик на коренот, па потоа по целата должина на оддалеченост од 5 до 10 сантиметри врзете уште еден ластик.

Направете го истото и од другата страна. Поентата е да ја насочите косата да стои рамно, при што треба да внимавате гумичките да не ја стегаат премногу.

Оставете ја косата собрана на овој начин во текот на ноќта.

Утредента, кога ќе ги тргнете ластичињата, косата ќе биде сува и права.