Еден час доцнење, публиката бесна и си ги бара парите назад – дали Владо Георгиев повторно се појави „дрво пијан“ на концертот во Белград?
Еден час доцнење, разочарана публика и низа реакции ја одбележаа вечерта на концертот на Владо Георгиев, одржан на 6 декември во Белградската Арена. Настанот, кој требаше да започне во 21 часот, започнал значително подоцна, а додека публиката чекала, на сцената настапувал неговиот долгогодишен пријател Игор Лазиќ – Нигор, објавува српскиот „Информер“.
Многу посетители преку Инстаграм споделувале видеа и коментари, нагласувајќи дека во арената имало празни места и дека чекале повеќе од час без никакво објаснување. Дел од нив дури посочиле дека морале порано да си заминат, поради што не го проследиле целиот концерт.
По бројните реакции се огласи и Здружението на потрошувачи „Ефектива“, кое порача дека посетителите имаат право да побараат делумно враќање на средствата. Од здружението наведуваат дека концертот започнал со значително задоцнување и дека за оваа состојба одговорноста ја носи продавачот на билетите, на кого може да се поднесе официјално барање за намалување на цената.
На социјалните мрежи продолжија критиките, вклучувајќи саркастични и гневни коментари од обожавателите, кои потсетија дека слични ситуации се случувале и во минатото. Сепак, Владо Георгиев веќе има закажано нов концерт на 13 декември, а дел од публиката се прашува дали следниот настан ќе помине без вакви непријатности.
