Духовни мисли од Св.Јован Златоуст, златната труба на правoславиeтo – „Ако родителите внимателно ги воспитуваа своите деца, не би било потребно ниту закони, ниту судови, ниту казни, ни јавни убиства“

Св. Јован Златоуст е познат како златна труба на православието. Денес ви носиме неколку духовни мисли од светителот.

„Подобро леб со сол во мир и без тага, отколку мноштво скапоцени јадења во тага и жалост.“

„Не е страшен гревот, туку бесрамноста по гревот.“

„Оние кои повредуваат со зборови се многу полоши од оние кои гризат со заби“.

„Богатството има само надворешен сјај, а внатре е исполнето со темнина, додека сиромаштијата – напротив. Ако би се отворила совеста на секого пред тебе, тогаш во душата на сиромавиот би видел голем спокој и сигурност, а во душата на богатиот – немир, збунетост и вознемиреност.“

„Да се засрамиме барем од ѕверовите. Кај ѕверовите сè е заедничко: и земјата, и изворите, и пасиштата, и планините, и шумите. А човекот станува посвиреп од ѕверот, изговарајќи ги овие студени зборови: ‘Тоа е твое, а ова е мое’.“

„На човекот му е невозможно секогаш да биде ист и во сè да успева, туку е природно понекогаш да биде послаб од својата сопствена сила.“

„Награди има не само за доблестите, туку и за страдањата, а за страдањата не се помали од тие за доблестите, понекогаш се дури и поголеми.“

„Кога ќе го нахраниш гладниот, сметај дека себеси си се нахранил. Таква е природата на ова дело: она што ќе го дадеме, ќе се врати кај нас“.

„Дајте им помош на тие кои нè молат за тоа, и дури ако нè лажат, не треба да се дава премногу значење. Зашто такво милосрдие, простување и добрина заслужува секој од нас.“

„Ако родителите внимателно ги воспитуваа своите деца, не би било потребно ниту закони, ниту судови, ниту казни, ниту мачења и јавни убиства.“

„Кој го ограничава постот само со воздржување од храна, тој многу го понижува. Не само усните треба да постат, не, нека постат и очите, и слухот, и рацете, и нозете, и целото наше тело.“

„Молитвата е големо оружје, неисцрпно богатство, пристаниште на мир, основа на спокојот; молитвата е корен, извор и мајка на бескрајните блага и посилна е од царската власт.“

„Што е смиреност, а што е малодушност? Кога ние, гледајќи ги другите како ги навредуваат, не ги браниме, туку молчиме, тоа е малодушност; кога пак самите, примајќи навреди, трпиме, тоа е смиреност.“