ДРАМА ВО ТУРСКИОТ ШОУБИЗНИС – Халит Ергенч осуден на затвор за лажно сведочење, поврзан со обид за соборување на владата! Еве ги деталите
„Моето присуство не значи соучесништво. Тоа беше израз на граѓанска свест, не политички план“, изјави Ергенч пред судот.
Турската јавност е потресена откако ѕвездата на легендарната серија „Величествениот“, Халит Ергенч, беше осуден на условна затворска казна поради давање лажно сведочење во случај поврзан со масовните протести во паркот Гези од 2013 година – симбол на отпорот против власта.
Судот во Истанбул неодамна му изрече на Ергенч казна од 1 година, 10 месеци и 15 дена затвор, додека неговиот колега Риза Коџаоглу доби 1 година и 8 месеци, под истото обвинение.
Advertisement
Иако казните засега се одложени (HAGB) – што значи дека нема веднаш да бидат спроведени – пораката е јасна: државата не простува дури ни на најголемите јавни личности кога е во прашање „државната безбедност“.
Стаорци во палатата?
Случајот се води како дел од поголема истрага против познатата агентка за таленти, Ајше Барим, која од јануари е во притвор под сомнение дека инструирала нејзини клиенти – актери, музичари и уметници – да го поддржат движењето Гези и со тоа да придонесат за „дестабилизација на државата“. Обвинителството тврдеше дека Ергенч и Коџаоглу биле дел од тој наводен план и свесно дале лажни изјави за да ја заштитат Барим и себе.
Во својата одбрана, Халит Ергенч негираше било каква поврзаност со организацијата на протестите, велејќи дека никогаш не бил во контакт со клучните фигури како Мемет Али Алабора и самата Барим.
Но, обвинителството презентираше фотографии, телефонски повици и видео-снимки, кои го прикажуваат актерот на самите протести, рамо до рамо со познати активисти.
„Моето присуство не значи соучесништво. Тоа беше израз на граѓанска свест, не политички план“, изјави Ергенч пред судот.
Сепак, судот оцени дека неговото сведочење било контрадикторно и со намерно изоставени информации, што доведе до донесување на обвинителната пресуда.
Судот не им простува ни на ѕвездите
И покрај тоа што казната е условна, овој преседан се смета за тежок удар врз слободата на изразување и правото на протест, особено кога се работи за личности со јавна одговорност.
Организациите за човекови права во Турција и во странство остро ја осудија одлуката, нарекувајќи ја „политички мотивирана“ и „обид за застрашување на културниот сектор“.
Во меѓувреме, Ајше Барим се соочува со далеку посериозно обвинение – обид за соборување на уставниот поредок, за што турското обвинителство бара казна затвор до 30 години.
Што следува?
Адвокатите на Ергенч и Коџаоглу најавија жалба, но правната борба допрва почнува. И додека судските сали се полнат со актери, турската јавност останува да се прашува: дали славата штити или ја забрзува пресудата?
Овој случај само ја потврдува тензијата меѓу уметничката слобода и државната контрола, прашање кое останува отворено во Турција повеќе од една деценија по протестите во паркот Гези.
