Џиновскo бебe стана интернет сензација – што се крие зад виралното видео што го гледаа 20 милиони луѓе

Млада мајка од САД предизвика вистински бум на социјалните мрежи кога на Тик-ток објави видео од нејзиниот четиримесечен син, кој, поради својата големина, ги надмина сите очекувања за просечен развој на бебе на таа возраст. Имено, бебенцето има само четири месеци, а тежи 10, 2 килограми.

Видеото, кое брзо собра речиси 20 милиони прегледи, отвори прашања за нормите за раст кај новороденчињата, односот на јавноста кон изгледот на децата и притисокот кој родителите го чувствуваат онлајн.

Од просечно новороденче до „вирална атракција“

Мејси Мугејл (21) од Оклахома, мајка на бебето кое го нарекуваат „џиновско беба“, раскажува дека нејзиниот син бил роден на 19 февруари 2025 година, со просечна тежина и должина: 3,6 килограми и 49,5 сантиметри. Но, уште од првите денови по раѓањето, покажал брз и интензивен раст.

„Секогаш беше напреден за една до две недели пред другите бебиња, дури и додека бев бремена“, вели Мејси. Таа додава дека во 34. недела од бременоста платила дополнителен ултразвук од љубопитност, каде ѝ било кажано дека плодот веќе тежи околу 2,8 килограми, што е над просекот за таа гестациска возраст.

Раст што го надминува просекот

Денес, на само четири месеци, момчето на Мејси е долго 61 сантиметар и тежи речиси двојно повеќе од просечна бебешка тежина за таа возраст. И носи облека наменета за деца од градинка, што кај многумина предизвика восхит, но и збунетост.

Иако визуелно изгледа многу поголем од неговите врсници, педијатрите ја увериле Мејси дека нема причина за загриженост: нејзиниот син е здрав, неговиот развој е уреден и едноставно припаѓа на групата бебиња со повисоки параметри.

„Луѓето понекогаш имаат големи бебиња. Тоа не значи ништо лошо“, изјавиле лекарите.

Од вториот ден по раѓањето, ова бебе има поголем апетит од просекот, вели неговата мајка. „Јаде повеќе, но лекарите велат дека е тоа сосема нормално за него. Не гледаат ништо проблематично во тоа“, додава таа. Таа секогаш го дои или го храни кога покажува знаци на глад, водејќи се според неговите потреби, а не според туѓи очекувања.

Реакции на јавноста – од восхит до осуда

Иако дел од публиката на Тик-ток е воодушевена од неговата „сила“ и „сладок изглед“, има и такви кои не се воздржуваат од остри и непријатни коментари. Некои дури ја обвинуваат мајката за прехранбени навики кои, според нив, можат да го загрозат здравјето на детето.

Мејси е јасна: „Ужасно е што има луѓе кои мислат дека е во ред да зборуваат така за бебе. Моето дете е здраво, а јас само следам совети од лекарите“.

Што велат стручњаците?

Според педијатрите, разликите во растот и развојот на бебињата се нормални, особено во првата година. Факторите како генетиката, метаболизмот, начинот на исхрана и индивидуалниот биолошки ритам имаат големо влијание. Важно е бебето редовно да се следи на здравствени контроли и неговиот развој да се оценува низ контекст, а не според споредби на социјалните мрежи.

Овој случај повторно го отвора прашањето: каде е границата меѓу здравиот интерес за родителство и токсичната култура на коментирање туѓи животи? Дали прекумерното експонирање на деца во медиумите и на Интернет ги прави мета на неосновани критики?

Мејси, и покрај негативните коментари, не се кае што го споделила видеото.

„Само сакав да покажам колку моето бебе брзо расте и дека тоа е сосема нормално за него. И тоа што изгледа поголемо не значи дека нешто не е во ред“, заклучува таа.