Денес се Цветници – што да направите за да ви цути годината
Празникот го одбележува свечениот влез на Исус Христос во Ерусалим, кога народот го пречекал со фрлање палмови гранчиња – симбол на победа и вечен живот.
Цветници (Цветносна недела, Врбица) е еден од најубавите и најрадосни православни празници, кој се слави неделата пред Велигден. Празникот го одбележува свечениот влез на Исус Христос во Ерусалим, кога народот го пречекал со фрлање палмови гранчиња – симбол на победа и вечен живот. Бидејќи на нашите простори нема палми, традицијата вели дека се користат гранчиња од врба, бидејќи таа прва се буди по зимата – симболизирајќи нов почеток, чистота и надеж.
Традиции и обичаи
Осветување на врбови гранчиња
На Цветници се носат врбови гранчиња во црква за осветување. По богослужбата, луѓето си ги носат дома и ги чуваат цела година – зад икона, кај вратата или во домашниот иконостас. Се верува дека тие носат заштита, здравје и благослов за домот и семејството.
„Удирање со врба” за здравје
Еден интересен народен обичај, присутен и кај нас, е нежното удирање со осветените гранчиња, најчесто децата или блиските, при што се изговараат зборови слични на:
„Не те бијам – в(е)рбата те бие! Биди здрав/а како в(е)рба!“
Овој ритуал симболизира пролетна пробуда, прочистување од болести и зли сили.
Зелен украс
Сѐ почесто и кај нас, на Цветници се украсува куќата со зелени гранчиња и цвеќиња. Зеленилото е симбол на живот, плодност и радост. Се верува дека така се повикува Божјата благодат врз домот.
Верувања поврзани со Цветници
Што ќе направите денес, така ќе ви биде цела година. Затоа се препорачува да сте со блиските, да простувате, да мислите на убаво, да не се карате, да не се гневите – за да бидете благословен/а со мир и љубов.
Не се работи тешка работа. Денот е празничен и треба да се помине во радост, молитва и скромна трпеза. Според народните верувања, кој денес тешко работи, ѝ ја одзема радоста на душата.
Се собира утринска роса. На некои места се верува дека росата на Цветници е лековита и носи убавина и долговечност.
Посадете цвеќе или дрвце. Старите преданија велат: „Ако на Цветници засадите нешто – ќе ви носи радост и живот.“ Ова е симбол на раст и благослов.
Што да направите за благодат на Цветници:
Запалете свеќа и помолете се со отворено срце.
Простете им на сите што ве повредиле – дури и во мислите.
Дајте милостина – дури и симболично.
Помислите и посакајте нешто убаво за другите.
Внесете зеленило или цвеќе во домот.
Направете добрина тивко, без очекување.
Бидете благодарен/на.
