Денес навршуваат 14 години од неговата смрт – Македонија сè уште не го заборава легендарниот глас што „стрелаше“ право во срце
на денешен ден, 6 декември, се навршуваат точно 14 години од смртта на легендарниот Гоце Арнаудов, пејачот со препознатливата насмевка, искрената енергија и гласот кој допираше директно во срце.
Арнаудов беше еден од најтрофејните македонски уметници, појава што не се заборава. Неговите настапи беа експлозивни и полни со движење, а надвор од сцената тивок, скромен и повлечен, човек со огромно срце кој секогаш знаеше да остане свој.
Македонската публика и денес ги памети неговите безвременски хитови како „Дали чекаш стара мајчице“, „Ај да беше стрела песната“, „Штом ноќта помине“… рефрени што се пеат со генерации и кои останаа дел од колективната музичка меморија.
Во неговата родна Струмица, каде што му беше подигнат споменик во малиот градски парк, дело на скулпторот Митко Тошев, љубовта и почитта кон него и понатаму живеат.
За потсетување, минатата година, во негова чест беше организиран и голем комеморативен концерт во Домот на културата „Антон Панов“, на кој настапија бројни македонски музички имиња, меѓу кои Елена Велевска, Александар Тарабунов, Кристина Арнаудова, Александра Јанева, Огнен Здравковски и хорот „Распеани Струмичани“.
Гоце Арнаудов беше повеќе од пејач, беше пријател за цел живот, татко со огромна љубов и професионалец што на секоја неправда реагираше гласно, а на секој човек пристапуваше чесно. Иако поминуваат 14 години од неговото заминување, неговите песни и неговиот дух сè уште живеат меѓу нас.
Македонската сцена не го заборава човекот кој ги полнеше салите, но пред сè, ги полнеше срцата.
