Дамјан и Сара го вратија ткаењето во центарот на Скопје – Возбудливо катче за шопинг, но и за запознавање со разбојот

Во центарот на Скопје, спроти нов Рекорд, се отвори нова продавница која го привлече нашето внимание.

Дамјан Ристовски, студент на Институтот за етнологија и антропологија, си ја оствари својата желба со отворање на оваа продавница која е воедно и работилница, наречена „Народни носии“.

Излогот е лесно препознатлив по разбојот и шаренилото од изложените производи од колекцијата на Дамјан. Веруваме дека тука може да си најде секој што си сака за себе, но и за подарок, од плетени чорапи до килимчиња па се до носија.

„Оние кои ме познаваат и ја знаат мојата работа сигурно ја знаат и мојата желба за ткаење. Учењето да ткаам на разбој ми е секојдневие и беше само желба од мојата соба знаењето и изработките да ги преместам во место кое за мене ќе биде катче за пренесување на мојата љубов која ја имам кон тоа“, вели Дамјан кој со ткаење се занимава цели десет години.

Дамјан не е сам во овој возбудлив проект, со него е Сара Јакимовска која се залага да се одржи во живот ткаењето на разбој.

Инаку, во оваа продавница може да се запознаете и со дел од изработката на разбој.