Дали сте подготвени да освоите 2.000 евра награда за најдолго лежење – ова е моменталниот рекорд?!

Во малото црногорско село Брезна повторно се одржува едно од најнеобичните натпреварувања во регионот – натпревар во лежeње. За главната награда од 2.000 евра, на креветите легнаа 20 натпреварувачи од различни земји, меѓу кои Русија, Украина, Турција, Босна и Херцеговина, Србија и Црна Гора.

Натпреварот функционира по едноставни, но строги правила – натпреварувачите мора постојано да лежат, а на секои осум часа имаат право на само 15 минути пауза за тоалет или кратка прошетка. Овa, на прв поглед изгледа лесен предизвик, сепак, бара исклучителна психолошка издржливост.

Организаторот Миќо Благојевиќ истакнува дека сè започнало како шега, инспирирана од стереотипите за мрзливоста на локалното население.

-Сега веќе гледаме дека тоа е сериозен ментален предизвик. Не е лесно да се остане во иста положба толку долго време, изјави Благојевиќ.

Оваа година натпреварувачите, освен храна и пијалоци, имаат и пристап до интернет, што според организаторите значително ја зголемува издржливоста на учесниците.

Веќе првиот ден неколку натпреварувачи се откажаа, но најголемо внимание привлече враќањето на Лидија – победничката од минатата година, која тогаш издржа рекордни 50 дена. Таа изјави дека оваа година е решена да го собори сопствениот рекорд и повторно да ја освои титулата.

Натпреварот продолжува, а очите на публиката се вперени кон креветите, каде секој час е борба помеѓу умот и телото.