Дали ќе станеме подобри личности после пандемијата со короната?

Дали откако ќе помине сето ова, повеќе ќе умееме да го цениме своето здравје? Дали откако ќе помине короната ќе бидеме подобри луѓе, повеќе ќе ги почитуваме другите и повеќе ќе им помагаме?

Страшните животни ситуации не’ тераат да даваме многу ветувања само да испадне се’ во ред. Секојдневно слушаме вести кои не’ погодуваат, се грижиме за своето здравје, се грижиме за состојбата и здравјето на нашите најмили. Но, дали ова ќе трае само додека трае пандемијата, додека во срцето имаме страв, немир и неизвесност?

Важно е да развиеме поголема самосвест. Оваа ситуација треба да не’ потсети колку е вреден животот. Коронавирусот ни носи нови животни лекции од кои сите треба да извлечеме одредена поука. Секогаш треба да си подаваме рака еден на друг, да веруваме во своите способности и да помагаме секогаш кога сме во можност.

Оваа несреќа ни се случува за да сфатиме колку сме ранливи, а истовремено колку сме силни кога сме заедно. Да не дозволиме ова да биде минливо. Што побргу да ја оставиме несреќата зад себе, па да продолжиме понатаму, да се родиме како нови личности кои ќе умеат да согледат колку е убав животот. Откако повторно ќе се родиме, да се обидеме да создадеме свет полн со вредности кој ќе му го оставиме на нашите идни генерации!