Гламур интервју со Ива Спасовска
Ива Спасовска е млада, амбициозна и елоквентна дама. Таа е една од нашите најталентирани млади дизајнерки. Својата креативност Ива Спасовска ја открива уште како многу мала, за на 16 години да започне со изработка на накит, а потоа приказната ја проширува и на фустани, капути, козметика. Но после долги години од постоењето на нејзиното атеље и работа како креатор, во последниов подолг период таа се насочи кон инфлуенсерството, односно тоа и станува нејзина професија.
„По години поминати во модната индустрија, сфатив дека мојата најголема пасија не е само создавањето облека, туку и раскажувањето приказни, инспирирањето и споделувањето содржина со мојата публика. Социјалните медиуми ми дадоа можност да комуницирам директно со моите следбеници и да создавам автентична содржина што инспирира, мотивира и влијае“ вели Ива во разговор за Гламур.
Целото интервју со Ива прочитајте го во продолжение…
Приватна архива
Прашање: Ива, ми се чини дека после долги години од постоењето на Вашето атеље и работа како креатор, во последниов подолг период како многу повеќе да сте насочени кон инфлуенсерството. Дали е точна мојата констатација и зошто се одлучивте на овој чекор?
Да, твојата констатација е точна. По години поминати во модната индустрија, сфатив дека мојата најголема пасија не е само создавањето облека, туку и раскажувањето приказни, инспирирањето и споделувањето содржина со мојата публика. Социјалните медиуми ми дадоа можност да комуницирам директно со моите следбеници и да создавам автентична содржина што инспирира, мотивира и влијае. Оваа промена е природен тек во мојата кариера, каде можам да спојам креативност, комуникација и мојата љубов кон брендови и lifestyle кој го живеам.
Прашање: Ова всушност за Вас е и како официјална професија – Content Creator или инфлуенсер. Можеш ли да ни објасниш како е да се биде инфлуенсер, колку труд бара тоа и како се станува успешен инфлуенсер?
Да, ова сега ми е официјална професија. Да се биде инфлуенсер изгледа лесно однадвор, но во реалноста бара огромен труд, доследност и креативност. Треба да знаеш како да создаваш ангажирачка содржина, да имаш стратегија за Instagram, да ги следиш трендовите и да одржуваш активна комуникација со твоите следбеници. Клучот за успех е автентичноста – кога луѓето ќе почувствуваат дека си вистински и дека им нудиш вредност, тогаш ќе ти веруваат и ќе останат лојални.
Приватна архива
Прашање: Дали добро се заработува од ова? И како бирате кого ќе рекламирате на Вашиот Инстаграм профил, колку внимавате на тоа?
Инфлуенсерството може да биде одличен извор на приход и солидно да се живее од него, но важно е што градам кредибилитет и внимателно бирам со кого работам. Јас рекламирам само брендови со кои се поистоветувам и во кои верувам. Долгорочната доверба на мојата публика ми е поважна, бидејќи интегритетот ми е пред сѐ.
Прашање: Колку следбеници имате и дали големиот број на следбеници значи и поголема одговорност врз она што секојдневно го постирате на Инстаграм?
Бројката секојдневно расте, во моментов имам 42.650 следбеници, и да, тоа носи голема одговорност. Луѓето гледаат, слушаат и понекогаш дури и се водат според она што инфлуенсерите споделуваат. Затоа секогаш внимавам моите пораки да бидат позитивни, инспиративни и реални. Пред два месеци имав 52.000 но избришав 10.000 неактивни следбеници од мојот профил, затоа што мене не ми треба бројка, важна ми е активноста на луѓето што ме следат, кога нешто е искрено. Важно е да се гради долгорочна соработка, а не само една реклама.
Приватна архива
Прашање: Колку инфлуенсерите имаат влијание според Вас на креирањето на јавното мислење и следење на Вашите навики и препораки?
Многу големо! Инфлуенсерите денес се дел од секојдневието и нивното мислење може да влијае на трендовите, одлуките за купување, па дури и на ставовите на луѓето за различни теми. Затоа е важно да се биде одговорен.
Прашање: Ми се чини дека луѓето забораваат дека Инстаграм е само збир од моменти и дека многу нешта се случуваат зад кулисите. Колку се разликува Вашиот живот од она што се прикажува на Инстаграм?
Многу! Она што го гледате на Инстаграм е внимателно селектиран дел од реалноста. Зад камерата има и умор, стрес, работа што не се гледа. Социјалните мрежи не ја прикажуваат целата слика. Јас се трудам да бидам што потранспарентна, но нормално, не ги споделувам сите предизвици и приватни моменти. Животот не е секогаш совршен како што изгледа на сликите, но важно ми е да споделувам автентична енергија и позитивност.
Прашање: Кои се предностите на оваа професија, а кои се маните?
Предностите се флексибилноста, креативноста и можноста да се работи со брендови што ги сакаш. Маните се тоа што си постојано изложен на јавно мислење, нема работно време, а понекогаш и приватноста страда.
Приватна архива
Прашање: Како одлучуваш со кого ќе соработуваш и која соработка досега Ви донела најголем профит?
Одлучувам според тоа дали брендот се вклопува во мојот стил и вредности. Една од моите најдраги соработки е со Max Factor, Schweppes, Fibula Travel, како и сите други кои можете да ги погледнете кај мене на профил, а исто така ми е драго и за сите што допрва доаѓаат но за кои станува збор ке останат тајна, ке видите во блиска иднина. :)
Прашање: Која е вистинската цел и насока на инфлуенсерството?
Да се создава вредна содржина, да се инспирираат луѓето и да се гради заедница базирана на доверба.
Прашање: Kој беше моментот кога сфативте дека ова е Вашата страст?
Кога сфатив дека можам да инспирирам и да помогнам некому преку содржината што ја споделувам. Кога осознав дека создавањето содржина ме исполнува повеќе од сè друго и кога почнав да добивам позитивен фидбек и поддршка од мојата публика.
Приватна архива
Прашање: Што Ви претставува најголем предизвик како инфлуенсерка во Македонија и како го надминувате?
Најголем предизвик е пазарот – мал е и нема доволно можности како во странство. Го надминувам така што се трудам да бидам професионална, доследна и да работам на градење долгорочни партнерства со брендовите. Со креативност и доследност, секогаш има начин.
Прашање: Како го балансирате времето помеѓу креирање на содржина и Вашиот личен живот?
Со добра организација.
Се трудам да поставам граници – не секој момент мора да биде содржина. Исто така, имам денови кога се исклучувам од социјалните медиуми за да се посветам на себе и блиските.
Приватна архива
Прашање: Ви се случило ли некогаш да паузирате подолго време од Инстаграм?
Да, понекогаш е потребна пауза за ментален одмор. Луѓето разбираат и секогаш се тука кога ќе се вратам, и тоа ми помогнало да бидам повеќе инспиративна и со јасна визија за тоа што сакам да правам.
Прашање: Како гледаш на иднината на оваа професија во Македонија?
Ќе расте, но ќе бара поголема автентичност. Луѓето веќе не сакаат само реклами, туку реални искуства, со поголем фокус на квалитетна и автентична содржина, наместо само на бројки и следбеници.
Приватна архива
Прашање: Дали имате некои совети за младите кои сакаат да започнат своја кариера како инфлуенсери?
Бидете свои, уникатни, градете ја заедницата органски и не очекувајте успех преку ноќ. Конзистентноста и автентичноста е клучна.
Прашање: Кој е Вашиот совет за брендови кои сакаат да соработуваат со инфлуенсери? Што е најважно да имаат предвид?
Најважно е брендот да избере инфлуенсер кој се поистоветува со нивните вредности и навистина го користи производот. Луѓето веднаш чувствуваат кога нешто е искрено. Важно е да се гради долгорочна соработка, а не само една реклама.