Цртите на лицето на таткото откриваат дали детето ќе биде машко – нова интересна теорија за полот на бебето

Според нова теорија на научници, изгледот на лицето кај мажот може да открие дали неговото прво дете ќе биде машко.

Иако резултатите се објавени и потврдени, експертите нагласуваат дека се потребни дополнителни истражувања.

Тим истражувачи од Универзитетот во Мичиген анализирал како цртите на лицето на таткото може да влијаат врз полот на првото дете. Тие ги проучувале фотографиите на 104 родителски парови со едно или повеќе деца.

И од мајките и од татковците било побарано да достават фотографии од лицето, кои потоа студенти ги оценувале според привлечност, доминантност и машкост/женственост.

Резултатите покажале дека една специфична карактеристика на лицето кај таткото е поврзана со 83% поголема веројатност првото дете да биде машко. Тоа можеби објаснува зошто Том Харди, Џејсон Стејтам и Расел Кроу добиле синови како први деца, пишува Дејли меил.

Студијата, објавена во списанието Adaptive Human Behaviour and Physiology, открила дека татковци чии лица биле оценети како подоминантни имале значително поголема веројатност да добијат син како прво дете. Овој резултат останал ист независно од нивната привлечност, машкост или возраст.

Истражувачите откриле дека секое зголемување на перцепираната доминантност е поврзано со 83% поголема веројатност за машки наследник. Но, кај лицето на мајките не била утврдена слична поврзаност.

Авторот на истражувањето Бенџамин Зубали изјавил за PsyPost дека една од теориите е дека жените со повисоко ниво на тестостерон околу моментот на зачнување – хормон кој се поврзува со раѓање на машки деца – почесто избираат партнери со доминантен изглед.

„Предлагаме веродостоен механизам преку кој личноста на мајката, хормоналните нивоа и преференциите кон партнерот може да влијаат на полот на бебето. Сепак, врската меѓу доминантните црти на лицето и полот на потомството бара дополнителни истражувања,“ објаснуваат научниците, пренесува британскиот медиум.