Библија за воспитување деца: Најпознатиот руски психолог дава златни правила за родителите
Познатиот психолог од Русија, кој е почитуван низ целиот свет, Михаил Лабковски, не нуди брзи решенија или гламурозни методи. Тој нуди нешто подобро – едноставни, човечки совети кои ако ги примениме, можат засекогаш да го сменат животот на нашите деца.
Рускиот психолог Михаил Лабковски е познат низ цела Европа по својот остар, но директен стил – секогаш вели што мисли, без „шминка“ и без лажна утеха. Неговите совети се едноставни, практични и делуваат. Посебно внимание предизвикаа неговите размислувања за тоа како се воспитуваат деца кои ќе пораснат во стабилни, самостојни и среќни возрасни личности.
Во гостување на една руска телевизија, Лабковски даде серија совети кои се вистинска „златна книга“ за секој родител – особено за оние кои сакаат да го изградат својот однос со детето без викање, уцени и класични казни.
Одлуките се учат од рана возраст
Ако сакате вашето дете да биде одлучно кога ќе порасне – научете го уште од најмало. Прашајте го секое утро: „Сакаш пржени јајца или омлет?“ Оваа едноставна пракса ја развива способноста да носи одлуки, што подоцна му помага при избор на професија, партнер, па дури и при важни животни премрежја.
Џепарлак од шеста година
Научете го детето да ракува со пари уште од мали нозе. Давајте му симболичен џепарлак секоја недела – ќе научи да планира, да штеди и да вреднува. Не е важно износот, туку пораката: „Имаш контрола и одговорност.“
Не го терајте да расчистува – направете го тоа игра
Чистењето не треба да биде казна. Претворете го во забава! На три-четири години, детето со радост ќе мие садови ако тоа изгледа како игра. И кога ќе има десет години– нема да се буни да си ги собере играчките.
Никако цртани додека јаде
Да, знаете дека ви е полесно со телевизор, но Лабковски е дециден: јадењето не е механичко полнење на стомакот преку устата. Научете го детето да ужива во храната, без екрани пред него. Ако не сака да јаде – тргнете го оброкот по 15 минути. Нема дете што останало гладно.
Не се терајте на игра
Ако не ви се игра со детето – немојте! Децата чувствуваат сè. Подобро е 20 минути искрена блискост отколку два часа одглумена родителска должност. Вашата радост е нивна сигурност.
Кажете: „Ја сакам својата работа“, а не „мора да одам на работа“
Кога одите на работа, не кажувајте му на детето дека „морате да заработувате“. Кажете му дека ја сакате својата работа. Детето така учи дека работата е нешто убаво и дека вреди да се има страст во животот.
Строго НЕ наместо физичко казнување
Лабковски е категоричен: „Физичкото казнување не е воспитување, туку испуштање агресија.“ Детето не разбира зошто го удирате – само чувствува страв. Не сакате да го тренирате како животно. Ако сте премногу лути – побарајте разговор, не удирајте го детето. Постојат паметни казни: одземање телефон, омилена играчка, и слично.
Љубов никогаш не е премногу
„Никогаш не сум сретнал дете кое добивало премногу љубов“, вели тој. Гушкајте ги почесто децата. Кажувајте им дека ги сакате. Тоа гради самодоверба што трае цел живот.
