Долгогодишниот соработник и пријател на покојниот Саша Поповиќ, Микица Гачиќ, проговори за иднината на музичкото натпреварување „Звезде Гранда“ и откри дали ќе дојде до промени во жири-екипата.
Откако Поповиќ ја загуби битката со тешката болест, многумина се прашуваа дали популарното натпреварување ќе продолжи и во кој облик.
Но, како што беше потврдено, новата сезона се подготвува, а тимот ќе се труди да ја одржи визијата на основачот.
„Никогаш повеќе не може да биде како што беше кога Сале беше жив. Тој и јас последните 12 години работевме заедно на аудиции, бев прв негов соработник, а се познаваме повеќе од 25 години. Да, голема е тагата, но ние продолживме да работиме. Брзо започнуваме нови аудиции за новата сезона, стартуваме со поголема сила затоа што тој го направи сето тоа и мораме да ја почитуваме таа приказна“, рече Микица за српски Телеграф.
Тој исто така стави точка на шпекулациите за промени во составот на жири-то.
„За сега, сè останува исто. Изминатите години Саша повторуваше дека тимот кој победува не треба да се менува. Тие се најдобрите за нас“, нагласи Гачиќ.
Основачот и креативен директор на „Гранд продукција“, Саша Поповиќ, почина на 1 март по тешко боледување.
Тој последните месеци се лекуваше на клиника во Париз, каде и почина, а неговата сопруга Сузана, ќерката Александра и посинокот Даниел беа со него во последните моменти од животот.
Во вечното почивалиште беше испратен на 6 март 2025 година на белградските гробишта.
