Ако патувате во Грција земете го ова предвид – со новиот закон за прекршок казна од 2 000 евра

Секој што размислува да патува во Грција треба да знае дека возењето под дејство на алкохол може да резултира со сериозна парична казна, како и губење на возачката дозвола. Новиот Закон за сообраќај во Грција, чија јавна расправа е отворена до 24 јануари, воведува строги санкции за прекршоци во сообраќајот.

Како што е најавено, возачите на кои во крвта ќе им се забележи од 0,50 г/л до 0,80 г/л ќе платат казна од 150 евра и 20 дена ќе останат без возачка дозвола.

Дозволата се враќа само по истекот на тој рок и со доказ за плаќање на глобата. За концентрација на алкохол од 0,80 г/л до 1,10 г/л казната е 700 евра, а возачката дозвола се одзема на 90 дена.

Во овој случај, прекршокот е класифициран како особено опасен за безбедноста на сообраќајот.

Доколку концентрацијата на алкохол надмине 1,10 г/л, казната достигнува 1.200 евра, а возачката дозвола се одзема на 180 дена.

Дополнително, возачот може да биде казнет со затворска казна од најмалку два месеци, а регистрацијата на возилото се отстранува за период од десет дена до шест месеци.

Секој што ќе го повтори прекршокот се соочува со уште построги казни, доколку возачот во рок од една година по втор пат биде фатен како вози под дејство на алкохол, ќе биде казнет со 1.000 евра, а ќе му биде одземена дозволата на 180 дена. Доколку концентрацијата на алкохол во крвта е над 1,10 g/l при повторен прекршок, казната се зголемува на 2.000 евра, а возачката дозвола се одзема на две години.

За трет прекршок во рок од пет години, возачот ја губи дозволата на седум години.

Во сите наведени случаи возилото е задолжително одземено и складирано, што дополнително ја усложнува состојбата на прекршителите. Со овие мерки Грција сака да го намали бројот на несреќи предизвикани од возење под дејство на алкохол и да ја зголеми безбедноста на патиштата.