Интересен настан што сакаме да го посетиме
Монографијата „Скопје – Архитектурата како фотографска скулптура (1963-1990)“ од Ерина Богоева ќе биде промовирана утре, на 13 ноември 2018, во 19 часот во книжарницата „Литература.мк“ на улицата „Македонија“. Книгата во издание на „Арс Либрис“, дел од „Арс Ламина – публикации“, содржи 80-ина фотографии.
Во фокусот на Богоева се 30 објекти од јавен и резиденцијален карактер, меѓу кои: Управата за хидрометеоролошки работи, Телекомуникацискиот центар, Градски ѕид (блоковите и кулите), студентскиот дом „Гоце Делчев“, Домот на Армијата, Соборниот храм „Св. Климент Охридски“, Католичката црква „Пресвето срце Исусово“ и други. „Документирањето на Скопје за мене е од уметнички аспект. Тоа е документирање на моментите кои минуваат и нема повторно да се вратат, а сепак се моменти исполнети со некој (различен) вид на убавина“, вели Богоева за проектот.
Проектот е поддржан од Град Скопје, како дел од конкурсот за проекти од областа на културата кои би го застапувале или збогатиле културниот живот на градот.
Фотографиите се снимани во временски период од 10 месеци, во различни временски услови.
Монографијата „Скопје – Архитектурата како фотографска скулптура (1963-1990)“ ќе биде промовирана во книжарницата „Литература.мк“ на 13 ноември 2018 (вторник) во 19 часот.
Промотор на монографијата „Скопје – Архитектурата како фотографска скулптура (1963-1990)“ ќе биде архитектот и фотограф Александар Наумчевски. Со овој настан во книжарницата „Литература.мк“ ќе бидат одбележани и 74 години од ослободувањето на Скопје.
