По бремената Марија Брзакова се трага и во Швајцарија, но безуспешно
По Марија се трага и во Швајцарија
Марија Брзакова исчезна пред 20 дена од семејниот дом во Босилево и од тогаш и се губи секоја трага.
Младата девојка последен пат беше видена во близина на семејниот дом во Босилево, кога во раните утрински часови излегла облечена во тренерки.
Нејзиниот траг се губи на 18 јануари (сабота) кога наутро излегла од својот дом и повеќе не се вратила.
Кога излегла од домот била облечена во тренерки во темна боја, на нозете имала патики или влечки, а со себе не носела ташна, ниту пак мобилен телефон или било каков друг документ. Висока е околу 160 сантиметри, средна градба, со долга костенлива коса.
Марија по потекло е од соседното село Турново. Таа е мајка на четиригодишна ќеркичка, а исчезнувањето го пријавил нејзиниот сопруг.
По неа трага полицијата, но засега не се откриваат многу податоци како од страна на полицијата така и од семејството.
Покрај полицијата, Марија досега ја бараа и ловџиите, селаните, роднините и пријателите, но безуспешно. Како што пренесуваат медиумите, по неа се трага и во Швајцарија, иако е познато дека го напуштила домот без документи, што значи дека не можела легално да ја напушти државата.
Мистериозно исчезнување
Екипите на „Фокус“ и „Слободен печат“ се обидоа да стапат во контат со некој од семејството, но безуспешно. Тие не сакаат да даваат изјави за медиумите, па затоа целиот случај е и по малку мистериозен. Никој не знае зошто нема повеќе информации од полицијата и семејството, иако се апелира до јавноста за помош. Никој не знае и кој ги објавува апелите.
Познато е само дека Марија заедно со сопругот Б.Б. (29) и нивната ќерка живееле во Швајцарија. Во Босилово се вратиле во септември 2019 година.
Родителите и на двајцата млади живееле во Швајцарија, но сега поради случајот се вратиле во Македонија.
Во апелите што беа објавени на социјалните мрежи пишува дека исчезнатата девојка е бремена.
Оставен е и број за контакт.
