Поминаа 12 години од смртта на легендарниот пејач Гоце Арнаудов – беше и остана еден од најголемите!
Беше несекојдневен музичар, неговите песни се уште им се омилени на многумина
На 6 декември, пред точно 12 години, почина еден од нашите најпознати фолк пејачи на сите времиња.
Музиката на легендарниот фолк-пејач Гоце Арнаудов веќе со децении е насекаде околу нас – неговите песни се вртат на Јутјуб, но и на радиостаниците, а постојано се и во репертоарот на бројни кафански музичари. Неговата музика го весели народот, а засекогаш ќе остане запаметен по песните: „Дали чекаш стара мајчице“, „Огин и пламен“, „Ај да беше стрела песната“ и уште многу други.
Многумина велат дека нема никогаш да го заборават и неговиот концерт во Струмица, кој Гоце го одржа во 2000 година, кога на градскиот стадион во неговиот роден град соба преку 10.000 луѓе, а од општината доби награда за пејач на деценијата и за почесен граѓанин.
Фото: Принтскрин/ Јутјуб
И по толку години од неговата смрт, оние што го познаваа за него велат дека таков пејач со автентичен глас и имиџ, нема да се роди повторно. Тој почина од рак во болница во Франција, 2011 година, а неговото заминување најтешко им падна на семејството – неговата сопруга и на неговите три деца што ги остави зад себе.
Фото: Инстаграм/ Кристина Арнаудова
Неговата ќерка Кристина Арнаудова го наследи талентот од него и како пејачка е добро позната за нашата јавност.
Фото: Инстаграм/ Кристина Арнаудова
Втората ќерка на Гоце, Харита, е среќно мажена и со сопругот и нивните две ќерки живее во Охрид, а покрај ќерките познатиот пејач имаше и син, Оскар, кој отсекогаш најмалку се експонирал во медиумите.
Фото: Фејсбук/ Гоце Арнаудов
Гоце на почетокот од својата кариера настапувал со групата „Крик“ низ цела поранешна Југославија, а по враќање во Македонија, во 1993 година, за поприлично кратко време ги освојува симпатиите на публиката и станува еден од омилените фолк-пејачи во нашата земја.
Фото: Принтскрин/ Јутјуб
Веќе следната, 1994 година, на Фолк-фест Валандово со песната „Дали чекаш стара мајко“ ги освојува сите награди.
По неговата смрт Гоце зад себе остави преку 200 песни, а за време на неговиот живот со години по ред беше прогласуван за најпопуларната личност во Македонија, а беше и еден од омилените пејачи кај нашите бројни иселеници од дијаспората.
Некои од неговите најпознати песни слушнете во продолжение…
