Ни во Германија не е сјајно – исповест на двајца млади гастарбајтери кои решија да се вратат дома
Интересна приказна на двајца „гастарбајтери“
Во морето вести за младите кои заминуваат од Балканот, ова е приказна за двајца Славонци кои одлучиле да се вратат во родниот Осиек и заради таквата одлука се пресреќни. Тие велат дека Германија не е ветената земја, но дека и во нивната татковина може убаво да се живее ако се работи. Тие воопшто не чекале за работа откако се вратиле, туку веднаш се вработиле како таксисти.
Како што пишува РТЛ, Тин Пинтариќ има 19 години и откако во Германија поминал четири месеци како градежен работник, одлучил да се врати во родниот Осиек бидејќи како што вели и во Германија не е сé така лесно како што многумина мислат. Неговиот работодавач во Германија бил некоректен па морал да работи и на црно, а и животот по работа не му бил лесен. Имено тој во Германија морал да ја дели својата соба со уште тројца цимери бидејќи за стан немал пари.
И неговиот колега Домагој Мрша кој иако бил одличен ученик, решил да замине во Германија во потрага по парче леб. Но таму и тој не бил задоволен од животот. Како што вели самиот, веднаш ја почувствувал разликата помеѓу неговиот менталитет и оној на Германците. „Тоа не се кажува директно, но работодавачите индиректно ти порачуваат дека никогаш нема да бидеш во рангот на Германците“, вели пријателот на Тин, Домагој за РТЛ.
Животот таму едноставно е прескап, па затоа и двајцата со новата работа како таксисти во својата татковина се презадоволни и среќни.
