Не игра секогаш на сигурно, но ретко може да згреши – Рашела во несекојдневно издание што не може секоја да го носи!
Рашела Мизрахи повторно не воодушеви и го привлече нашето внимание со изборот на нејзиниот фустан.
Веќе и врапчињата на гранките знаат дека во Македонија се одржуваат избори, а ние како некој што не го интересира политика, туку само мода, не можеме а да не го искоментираме стилот на нашите дами.
И повторно разгледувајќи ги фотографиите што познатите политичарки ги објавуваат на социјалните мрежи, се воодушевивме од уште едно интересно издание на Рашела Мизрахи.
Имено, таа овој пат носеше поприлично интересна модна комбинација, која можеме да ја замислиме како на озбилни настани од еден ваков тип, па и на свечени прослави. Во прашање е фустан со должина нешто над колена кој е во темно сина боја, со црвена јака и еден мал дел на ракавите кои се со ¾ должина. Но она што посебно го прави овој фустан да изгледа ефектно е геометриската бела шара, преку целиот фустан, кој предизвикува мошне впечатлив асиметричен ефект. Во прашање е модел со крој каков Мизрахи најчесто носи, а интересно е и тоа што ваквата комбинација на бои – црвена, темно сина и бела – одлично и стојат, посебно во комбинација со изборот на балетанки во светло сина нијанса и црвениот детаљ во косата со која и е врзана пунџата во стилот на старите холивуски диви, а која е нејзиниот заштитен знак.
Рашела на уште еден настан од пред неколку дена носеше рамни обувки, но не ретко знае да не изненади и со изборот на чевли со високи потпетици кои секогаш одлично се вклопени со останатите деталји во нејзиниот стајлинг.
Па уживајте во фотографиите од нејзиниот официјален Инстаграм профил, но и во изборот на фустани што го приредија нашите модни уредници, а кој е инспириран од стилот на оваа наша дама.