Пратеникот Александар Кирацовски и покрај тоа што беше сменет од позицијата преку отворено писмо му се заблагодари на премиерот но и на соработниците. Но она што најмногу привлече внимание во неговото обраќање преку социјалните мрежи беше тоа што Александар и се заблагодари и на својата сопруга за огромната поддршка што ја добивал од неа за време на најтешките моменти, како што напиша тој самиот на неговиот профил на Фејсбук.
Инаку, пратеникот кој беше сменет од позицијата генерален секретар на СДСМ во центарот на вниманието се најде минатата година кога одредени медиуми објавија дека ја вработил својата фризерка во МЕПСО. Имено, тогаш дел од македонските медиуми го обвинија за непотизам, а Кирацоски за медиумите изјави дека се работи за непријатна шега со која само сака да се уништи неговиот углед и дека девојката никогаш не го потстрижувала.
„Девојката ја знам само од видување и нема ни трошка вистина во таквите обвинувања“, се правдаше тогаш Кирацовски.
Инаку поранешниот генерален секретар на СДСМ денес преку социјалните мрежи му честиташе и на неговиот наследник во партијата. Еве што напиша тој на Фејсбук:
„Му честитам на мојот другар Љупчо Николовски, наследник на функцијата Генерален Секретар на СДСМ, за неговиот избор и му посакувам многу успех проследен со здравје и мудрост.
Љупчо е исклучителен човек, добар другар со вредности кои го издвојуваат. Се нафаќа, буквално, на една од неколкуте најтешки позиции, во чие практикување нема да биде сам, ќе ја има целата моја поддршка, поддршката од претседателот Заев и останатите истакнати сопартијци.
Неговиот успех, ќе биде наш заеднички успех, а кон постигнување на истиот сите ние треба да бидеме негова поддршка, но и да имаме големо разбирање за неговата позиција, неговите постапки, неговите предизвици и бројните секојдневни обврски.
Гази напред, другар мој!“
