Голема полициска акција утринава на МВР – Се апсат директори
Утринава полицијата прави претреси кај лекари од Клиниката за Онкологија.
Претресите се во склоп на акцијата која пред неколку месеци ја почна екс министерот Оливер Спасовски со скопското обвинителство за низата злоупотреби кои се случувале на оваа клиника.
Очевидци на Клиниката за Онкологија посочија дека во 08:30 часот утрово полициски службеници со лисици на рацете изнеле еден од поранешните директори на Клиниката, објави Сител. Засега неофицијално, приведени се неколкумина, а меѓу нив е и поранешниот директор на Онкологија Нино Васев.
Фокус извести дека Васев е приведен во полициска станица по налог на обвинителката која го води предметот за кражба на цитостатици.
Последните информации говорат дека тој бил пронајден некаде низ клиниката и му било навестено дека е лишен од слобода.
Претреси се направени и кај Н.Н., и Е.Џ, а медиуми тврдат дека полицијата утрово влегла кај вкупно осум лица кои се опфатени во истрагата за злоупотреби во Клиниката за онкологија. Одземени се телефони, компјутери, документација.
Има и лица кои се недостапни за органите на прогонот.Полицијата не успеала да ги лоцира на адресите кои ги дало Обвинителството.
– Се преземаат дејствија по наредба на јавен обвинител. Штом имаме повеќе информации ќе споделиме, велат од ОЈО за Сител, чија екипа е пред Клиниката, каде тековно течат работите со здравствените услуги.
Како што неофицијално објави Телма, пак, три лица се избегани во странство додека траела предистрагата за случајот Онкологија.
На барање на Обвинителството и по судско одобрение, утрово се вршеше претрес кај лекари во Клиниката за онкологија и радиотерапија. Полицијата рано утрово влегла во нивните домови, каде со истражители од Обвинителството се проверувало дали учествувале во злоупотреби и кражби на Клиниката, објави „Скопје1“.
Инаку, претресите се прават според веќе отворен предмет за злоупотреби на оваа Клиника, при што истражители утврдуваат дали и како била крадена скапата терапија која треба да спасува животи на заболени од рак.
Акцијата е во тек и засега не се споделуваат информации во јавноста од ОЈО.
