Струмичанка ја малтертирала 4-годишната ќерка и ја терала на питачење, детето е хоспитализирано

Мајка од Струмица е осомничена за кривично дело запуштање и малтретирање на дете, известуваат  од Основното јавно обвинителство од Струмица.

Отттаму е поднесена Наредба за спроведување истражна постапка против мајка.

Осомничената наместо да се грижи за девојчето и да го воспитува, таа ја оддала на питачење на студот по улиците. На девојчето му се влошила здравствената состојба и од Струмица е пренесена во Детската клиника во Скопје.

„Осомничената, иако била должна да ја издржува и да се грижи за животот и здравјето на нејзината четиригодишна ќерка, грубо ја запоставила својата родителска должност за грижа и воспитување, ја запуштила и дозволила детето да се оддаде на питачење, што штетно влијаело на неговиот развој, здравје и лична безбедност. Поради тоа настапило тешко нарушување на здравјето на детето, кое во тешка здравствена состојба на 17.1.2024 година било најпрво примено во ЈЗУ Општа болница Струмица, а потоа хоспитализирано на Клиниката за детски болести во Скопје, велат од ОЈО.

Надлежниот јавен обвинител продолжува да постапува и го очекува вештиот наод од Институтот за судска медицина во поглед на причините за настанатите повреди кај девојчето. По барање на јавниот обвинител, Центарот за социјални работи постапи согласно своите надлежности за обезбедување заштита на другите три деца од семејството.