Откако ФЗО го одби барањето за лекување во странство на Леонид Индов, граѓаните бесни поради ваквата одлука, почнаа самоиницијативно да собираат пари за да му помогнат на младото момче.

Барањето за Леонид Индов е одбиено како неосновано, бидејќи не се работи за упатување на лекување во странство, туку за извршување на здравствената услуга медицинска рехабилитација како продолжено болничко лекување, велат од Фондот за здравствено осигурување (ФЗО).

Станува збор за сума од 140 илјади евра којашто семејството на момчето кое лани се повреди на одмор во Грција и остана врзано за кревет, не знае од каде да ја најде. Оттаму додаваат дека решенијата за остварување на права од задолжително здравствено осигурување на осигурените лица, Фондот ги донесува согласно законските прописи и правилници.

Градот Скопје со 50 градски институции отпочнува хуманитарна акција за обезбедување на неопходните средства за лекувањето на Леонид Индов.

„Од утре се отпочнува со хуманитарна акција во сите 50 градски јавни претпријатија, градски јавни установи и средни училишта во кои вработените и сите граѓани што ги посетуваат овие институции ќе може да придонесат за лекување на Леонид, кој во моментов се наоѓа на лекување во Австрија“, велат од Град Скопје .

„Дополнително, во Петок 23.02.2024 година во 12 часот, во средното училиште на Град Скопје Георги Димитров ќе се одржи голем хуманитарен базар на рачни изработки од средношколци од сите 23 средни училишта под надлежност на Град Скопје“ .

Во меѓувреме, граѓаните самоиницијативно почнаа да споделуваат апел за помош и да донираат пари за да се соберат потребните средства за лекување.

За сите хумани граѓани ова се телефонските броеви за донации.

Т-МОБИЛЕ 143-118

А1 143-500

Младиот Леонид Индов во моментов е на лекување во центарот за повреди во Меидлинг, Виена, Австрија.

ФЗО го одби барањето на Леонид за лекување во странство иако тој веќе две недели е во Виена